आजको मौसम : यी प्रदेशमा भारी वर्षाको सम्भावना

काठमाडौँ- जल तथा मौसम विज्ञान विभागका अनुसार बिहान देशभर सामान्यदेखि पूर्ण बदली रहेको छ । मौसम पूर्वानुमान महाशाखाले अहिले प्रदेश १, प्रदेश २, बागमती, गण्डकी, लुम्बिनी र सुदूरपश्चिम प्रदेशका केही स्थानमा सामान्य वर्षा भइरहेको जनाएको छ ।

महाशाखाका अनुसार मनसुनको न्यून चापीय रेखा नेपालको तराई भू–भाग नजिक रहेका कारण दैनिक रुपमा वर्षा भइरहेको र यो क्रम अझैं केही दिन रहने जनाएको छ ।

महाशाखाका अनुसार आज दिउँसो देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षाको सम्भावना छ । गण्डकी, लुम्बिनी तथा सुदूरपश्चिम प्रदेशका केही स्थानमा भारी वर्षाको सम्भावना महाशाखाको भनाइ छ ।

राति देशभर सामान्यदेखि पूर्ण बदली रही धेरै स्थानमा हल्का देखि मध्यम वर्षाको सम्भावना रहेको छ । मौसम पूर्वानुमान महाशाखाले गण्डकी, र बागमती प्रदेशका एक–दुई स्थानमा भारी वर्षाको सम्भावना रहेको जानकारी दिएको छ ।