आजको मौसम : यी प्रदेशमा भीषण वर्षाको सम्भावना

काठमाडौँ- आज प्रदेश १, बागमती र गण्डकी प्रदेशका एक वा दुई ठाउँमा भीषण वर्षाको सम्भावना रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ । महाशाखाले भीषण वर्षाका कारण ती प्रदेशमा पहिरोको जोखिम र नदीनाला तथा खोलामा पानीको सतह बढ्न सक्ने भएकाले सतर्कता अपनाउन आग्रह गरेको छ ।

अहिले देशभर मनसुनी वायु प्रभाव र दक्षिणी भू-भाग नजिक मनसुनी न्यून चापीय रेखा रहेकाले सामान्यदेखि पूर्ण बदली रही गण्डकी र बागमती प्रदेशका केही स्थानहरुमा वर्षा भइरहेको छ ।

मौसम पूर्वानुमान महाशाखाका अनुसार दिउँसो पनि देशभरको मौसम बदली रही अधिकांश स्थानमा हल्कादेखि मध्यम वर्षाको सम्भावना रहेको छ । यस्तै‚ प्रदेश १ र गण्डकी प्रदेशका एक वा दुई स्थानहरुमा भीषण वर्षाको सम्भावना रहेको छ ।

देशभर आज राति सामान्यदेखि पूर्ण बदली रहनेछ । प्रदेश १, प्रदेश २, बागमती प्रदेश र गण्डकी प्रदेशका अधिकांश स्थानका साथै लुम्बिनी, कर्णाली र सुदूरपश्चिम प्रदेशका केही स्थानमा हल्कादेखि मध्यम वर्षाको सम्भावना रहेको छ । मौसम पूर्वानुमान महाशाखाका अनुसार प्रदेश १, बागमती र गण्डकी प्रदेशका केही स्थानमा भने भीषण वर्षाको सम्भावना रहेको छ ।