दक्षिण कोरियामा श्रम ऐन परिवर्तन गर्न माग

सोल- दक्षिण कोरियामा भएको श्रमिक सभामा सरकारले रोक लगाए पनि २० हजार जनाले सहभागिता जनाएको समाचारहरुमा जनाइएको छ।

कोरियाली ट्रेड युनियन कन्फेडेरेसन (केसीटीयू) को प्रमुख छाता  समूहले शनिबार आयोजना गरेको र्याल्लीमा देशभरबाट २० हजार सहभागी उल्लेख गरिएको छ।

श्रमिक अधिकारकर्मीहरु दोङ्गदेमुन बजार नजिकैको क्षेत्रमा भेला भएका थिए, जुन दक्षिण कोरियाको श्रम आन्दोलनको प्रतीक मानिन्छ।

यहाँ मजदूर अधिकारकर्मी स्वर्गीय कार्यकर्ता चुन ताई-इलले आत्मदाह गरेका थिए । शनिबार चुनको मृत्युको ५१ औं वार्षिकोत्सवको मौका पारेर भेला आयोजना गरिएको थियो।

संगठनले सुरुमा सहरको केन्द्रमा रहेको ग्वाङ्घवामुन स्क्वायरमा र्‍याली गर्ने योजना बनाएको थियो तर र्‍यालीको लागि मानिसहरूलाई भेला हुन नदिन प्रहरीले बसहरूसहित क्षेत्रमा अवरोध गरेपछि अचानक योजना परिवर्तन गरिएको थियो।

र्‍यालीका क्रममा केसीटीयूले श्रम ऐनलाई पूर्ण परिमार्जन र कामको अवस्था राम्रो बनाउन माग गरेको थियो ।