काबुल विमानस्थलमा विस्फोट : अमेरिकी सैनिकसहित मारिनेको संख्या ६०

काठमाडौँ- बिहीबार साँझ अफगानिस्तानको राजधानी काबुलको हामिद कारजाई अन्तर्राष्ट्रिय विमानस्थल अगाडि भएको विस्फोटमा ज्यान गुमाउनेको संख्या ६० पुगेको छ । त्यस्तै १ सय ६० जना घाइते भएका छन् ।

यो संख्या अझै बढ्न सक्ने आँकलन गरिएको छ । बीबीसीले दुई ठूला विस्फोटका घटनामा चारजना अमेरिकी सैनिक सहित १३ अमेरिकी नागरिकको पनि मृत्यु भएको जनाएको छ । घटनापछि विमानस्थलबाट हुने सबै उडान बन्द गरिएको छ । अमेरिकी रक्षा मन्त्रालय पेन्टागनले आतंकवादी संगठन आईएसआईएसको खुरासनले हमला गरेको जनाएको छ ।

बिहीबार साँझ हमिद कारजाई विमानस्थलको गेटमा पहिलो विस्फोट भएको थियो । त्यसपछि एयरपोर्ट नजिकै ब्यारन होटल क्षेत्रमा विस्फोट भएको थियो । जहाँ बेलायती सैनिक बस्दै आएका थिए ।

पेन्टागनले एयरपोर्ट बाहिर तीन सन्दिग्ध देखिएको जनाएको छ । यिनमा दुईजना आत्मघाती आक्रमणकारी थिए । अर्का व्यक्ति भने बन्दुक बोकेर आएका थिए ।तालिबानले यसलाई आतंकवादी हमला भनेको छ । अमेरिकी राष्ट्रपति जो बाइडेनलाई हमलाबारे जानकारी पुगेको छ । विस्फोटपछि एयरपोर्टमा लगातार गोली चलेको थियो । एक अधिकारीले यस घटनामा कयौँ अफगानी नागरिक मारिएको बताएका छन् ।

यसअघि तालिबानले अमेरिकालाई चेतावनी दिँदै ३१ अगस्टसम्म देश छाडिसक्न भनेको थियो । अमेरिकाले पनि तोकिएको समय सीमामा हट्ने बताएको थियो । तर ह्वाइट हाउसले ३१ अगस्टपछि पनि उद्धार अभियान जारी राख्ने बताएको थियो ।