भारतमा थप ४८ हजार संक्रमित, झण्डै १२ सयको मृत्यु

काठमाडौँ- भारतमा कोरोनाभाइरसको संक्रमणबाट थप ४८ हजारभन्दा बढी संक्रमित भएका छन् । पछिल्लो २४ घण्टामा ४८ हजार ६९८ जना संक्रमित भएका सरकारी अधिकारीहरुले जानकारी दिएका हुन् ।

संक्रमणमुक्त भएकाहरुको संख्या भने थप संक्रमितको संख्याभन्दा बढी रहेको छ । सोही अवधिमा संक्रमणमुक्त भएकाहरुको संख्या ६४ हजार ८१८ रहेको अधिकारीहरुले बताएका छन् ।

त्यसैगरी पछिल्लो एक दिनमा भारतमा कोरोनाभाइरसका कारण थप एक हजार १८३ जनाको मृत्यु भएको छ । कोरोनाभाइरसको महामारीको अवस्थामा सुधार आइरहेको भारतको केन्द्रीय स्वास्थ्य तथा परिवार कल्याण मन्त्रालयले जनाएको छ ।

भारतमा अहिलेसम्म कुल संक्रमितको संख्या तीन करोड एक लाख ८३ हजार १४३ पुगेको पनि अधिकारीहरुले जनाएका छन् । ती मध्ये दुई करोड ९१ लाख ९३ हजार ८५ जना संक्रमणमुक्त भएका छन् भने तीन लाख ९४ हजार ४९३ जनाको मृत्यु भएको छ ।

भारतमा अहिले पनि पाँच लाख ९५ हजार ५६५ जना कोरोनाभाइरसबाट संक्रमित अवस्थामै रहेको मन्त्रालयले जनाएको छ । कुल संक्रमित मध्ये ९६.७२ प्रतिशत मानिस कोरोनाभाइरसबाट संक्रमणमुक्त भएको तथ्यांकले देखाएको छ ।

ती मध्ये १.३१ प्रतिशतको मात्रै मृत्यु भएको छ । भारतको स्वास्थ्य अनुसन्धान परिषद्ले पछिल्लो २४ घण्टामा १७ लाख ३५ हजार ७८१ जनाको कोरोना परीक्षण गरेको छ । यही जुन २५ तारिखसम्ममा भारतमा अहिलेसम्म कुल ४० करोड १८ लाख ११ हजार ८९२ पटक कोरोना परीक्षण गरिएको छ ।