भारतमा केही घट्यो संक्रमण, मृत्युदर पनि घट्यो

काठमाडौं- भारतमा कोभिड-१९ संक्रमण निकै ओरालो लागेको छ । हिजोको भन्दा ३७ हजारले कम संख्यामा संक्रमण पुष्टि भएको देखिएको छ ।

विगत पाँच दिनदेखि दैनिक चार लाख भन्दा माथि संक्रमण देखिदै आएकोमा गत २४ घन्टामा भने तीन लाख ६६ हजारमा मात्रै संक्रमण पुष्टि भएको त्यहाँको स्वास्थ्य मन्त्रालयले जनाएको छ ।

संक्रमणमा कमी आएसँगै ज्यान गुमाउनेको संख्या पनि आधिकारिक तथ्यांकमा केही घटेको छ । पछिल्लो २४ घण्टामा ज्यान गुमाउनेको संख्या तीन हजार सात सय ५४ रहेको छ । त्यस अघि दैनिक चार हजारभन्दा धेरैको ज्यान गइरहेको थियो  । यससँगै भारतमा कोभिड–१९ बाट ज्यान गुमाउनेको संख्या दुई लाख ४६ हजार नाघेको छ । भारतमा हाल सक्रिय संक्रमितको संख्या साढे ३७ लाख भन्दा धेरै रहेको छ ।

तथ्यांकमा संक्रमण केही घटेको देखिए पनि जनस्वास्थ्य विज्ञहरुले महामारीको उच्चतम् अवस्था आउनै बाँकी रहेको बताइरहेका छन् । भारतमा आउँदो महिना दैनिक संक्रमण संख्या १० लाख नाघ्न सक्ने प्रक्षेपण गरिएको छ ।