दक्षिण कोरियाली पानीजहाज चालक इरानद्वारा रिहा

सोल – दक्षिण कोरियाली तेल ट्याङकर बोक्ने पानी जहाज चालकहरुको टोलीलाई इरानबाट रिहा गरिएको छ । उनीहरु गत महिना इरानको सामुद्रीक क्षेत्रबाट इरानी सैनिकहरुको कब्जामा परेका थिए ।

एण्टी हाङ्कुक छेमी कम्पनीको उक्त पानी जहाजमा चालक दलका २० जना मानिस रहेका थिए । उनीहरुलाई समुद्री क्षेत्रमा तेल प्रदुषण गराएको भन्दै इरानको इस्लामिक रिभोलुसन गार्ड कर्प्सले नियन्त्रणमा लिएका थिए ।

मानवीय नाताले तथा दक्षिण कोरियाली सरकारको अनुरोधमा उनीहरुलाई रिहा गरिएको इरानी अधिकारीहरुले बताएका छन् । समाचार संस्था रोयटर्ससँगको कुराकानीमा इरानी सरकारका प्रबक्ताले उक्त कुरा बताएका हुन् ।

विज्ञहरुले इरानका सामाग्रीहरुलाई दक्षिण कोरियाले बन्धक बनाएको प्रतिसोधका रुपमा उक्त ट्याङकर कब्जा गरिएको हुनसक्ने बताएका छन । चालकहरु रिहा भएता पनि पानीजहाज छोडिएको, नछोडिएको बारे कुनै सुचना सार्वजनिक भएको छ‌ैन ।