दक्षिण कोरियाले प्योङ्याङ बिरोधि गतिविधि बन्द गर्ने

सोल – दक्षिण कोरियाली संसदले सोमबार दुई कोरियाली सीमाक्षेत्रमा हुने गरेका उत्तर कोरिया बिरोधी गतिविधिलाई बन्द गर्ने सम्बन्धि बिवादास्पद प्रस्तावलाई पारित गरेको छ । अधिकारकर्मीहरुले स्वतन्त्रताको हक बिरुद्ध उक्त प्रस्ताव रहेको भन्दै बिरोध गर्दै आएता पनि संसदले पारित गरेको हो ।

पछिल्लो समयमा दुई कोरिया बीचको सम्बन्धलाई लिएर प्योङयाङ बिरोधी पर्चा उत्तर कोरिया तर्फ उडाउन बन्द गर्ने प्रस्ताव संसदमा पेश गरिएको थियो । उक्त प्रस्ताव पेश गरिएसँगै अब सीमा क्षेत्रमा उत्तर कोरिया बिरोधी कुनै पनि पर्चा तथा पम्प्लेटहरु उडाउन पाइने छैन । यदि कसैले उक्त कार्य गरेको पाइएमा ३ बर्ष कैद र २७,००० अमेरिकी डलर जरिमाना गरिने छ ।

सन् २०१८ मा नै दुबै देशका नेताहरुले सहमति गरेको उक्त गतिविधि बन्द गराउने सम्झौता हालसम्म पनि कार्यान्वयनमा आएको थिएन । ६ महिना अघि किम जोङ उनकी बहिनी किम यो जङ्गले सोही मुद्दालाई लिएर दक्षिण कोरिया बिरुद्ध आक्रामक रुपमा प्रस्तुत भएसँगै उक्त गतिविधिलाई गैर कानुनी बनाउन संसदमा प्रस्ताव पेश गरिएको थियो । संसदमा भएको मतदानका क्रममा पर्चा उडाउने गतिविधि बन्द गराउने पक्षमा १८७ मत परेको थियो भने बिपक्षमा शुन्य मत परेको थियो ।

सन् १९५०-५३ मा भएको कोरियाली युद्ध पश्चात कोरियाली प्रायद्वीप शान्त रहन सकेको छैन । युद्ध अन्त्य भएता पनि आपसी कटुता भने अझै ब्याप्त नै रहेको छ । दुई कोरिया बीच सम्बन्ध सुधारका अनेकौँ प्रयास भएता पनि हालसम्म अपेक्षित नतिजा भने आउन सकेको छैन । संसदको पछिल्लो कदमले सम्बन्ध सुधारमा केही मलजल गर्ने भने विज्ञहरुले अनुमान गरेका छन् ।