दक्षिण कोरियाले मृत्युदण्ड रोक्ने पक्षमा समर्थन गर्ने

सोल – दक्षिण कोरियाले पहिलो पटक संयुक्त राष्ट्रसंघको मृत्युदण्ड रोक्ने निति प्रति समर्थन गर्ने भएको छ । कोरियाली न्याय मन्त्रालयले बुधबार बताए अनुसार कोरियाली इतिहासमा पहिलो पटक राष्ट्रसंघको उक्त नितिलाई समर्थन गरिएको हो ।

हाल संयुक्त राष्ट्रसंघले नियमित रुपमा मृत्युदण्ड सम्बन्धि नियमलाई कडा बनाउदै लगेको छ । मृत्युदण्डलाई निरुत्साहित गर्ने उद्देश्य सहित हाल संयुक्त राष्ट्रसंघले प्रावधानहरुमा समेत परिवर्तन गर्दै आएको छ । सन् २००७ बाट २०१८ सम्ममा राष्ट्रसंघले सात पटक उक्त बिषयमा बहस चलाएको भएता पनि मृत्युदण्ड बन्द गर्ने या नगर्ने भन्ने विवादका कारण दक्षिण कोरियाले आफ्नो मत स्पष्ट पार्न सकेको थिएन ।

दक्षिण कोरियामा मृत्युदण्डको प्रावधान भएता पनि बिरलै मात्र उक्त आदेश अदालतबाट आउने तथा विश्वका धेरै राष्ट्रहरुले हाल मृत्युदण्ड विरुद्धको कानुनमा सहमति गरेका कारण दक्षिण कोरियालाई पनि उक्त नियमप्रति ऐक्यवद्धता जनाउन नैतिक दवाव सृजना भएको हो ।

तत्काल दक्षिण कोरियाबाट मृत्युदण्ड हट्ने हो वा हैन भन्ने बिषय कानुन परिमार्जनले मात्र भन्ने भएता पनि संयुक्त राष्ट्रसंघको मृत्युदण्ड रोक्ने कार्यक्रममा भने सहमति जनाइने मन्त्रालयले बताएको छ । दक्षिण कोरियामा अन्तिम पटक मृत्युदण्ड सन् १९९७ को डिसेम्बर ३० तारिखमा दिइएको थियो ।