उत्तर कोरियामा सार्वजनिक स्थानमा धुम्रपान निषेध

सोल – उत्तर कोरियाले बुधबारबाट लागु हुनेगरि सार्वजनिक स्थानमा धुम्रपान निषेध गरेको छ । लागु गर्न कठीन देखिएको उक्त नियम देशभर लागु गरिएको हो ।

उत्तर कोरियाको सर्वोच्च जनसभाले लामो समयबाट अभ्यास गर्न प्रयास गरिएको उक्त नियमलाई लागु गरेको हो । नियम लागु गरिएसँगै अब उत्तर कोरियामा सुर्तिजन्य पदार्थको उत्पादन तथा विक्री वितरणमा कमी आउने छ ।

उत्तर कोरियाली शाशक किम जोङ उन आफै चेन स्मोकर भएका कारणले उक्त बिषयलाई त्यहाँका सञ्चार माध्यमले कसरि हेर्छन् भन्ने बिषयले सबैलाई आकर्षित बनाएको छ । उत्तर कोरियाली सञ्चार माध्यम केसिएनएका अनुसार त्यहाँका ३१ प्रकारका स्थानमा अब धुम्रपान गर्न पाइने छैन ।

निषेध गरिएका स्थानहरुमा रंगमञ्च, सभाहल, बाल स्याहार गृह, विद्यालय तथा अस्पताल लगायतका क्षेत्र रहेका छन् । सन् २००५ मा समेत उक्त नियम लागु गरिएको थियो तर किम आफैले सार्वजनिक स्थानमा धुम्रपान गरेपश्चात पालन भने गरिएको थिएन ।