कोरियामा कोरोना फैलाउने धर्मगुरु तारेखमा रिहा

सोल – दक्षिण कोरियाको अल्पसंख्यक धर्म सम्प्रदाय छिजोञ्चीका धर्मगुरु ८९ बर्षीय ली मान हीलाई तारेखमा रिहा गरिएको छ । बिहिबार रिहा गरिएका उनि माथि सरकारको कोरोना रोकथाम अभियानमा असहयोग गरेको आरोपमा पक्राउ गरिएको थियो । उनलाई प्रहरीले गत अगष्टमा पक्राउ गरेको थियो ।

८९ बर्षीय हीलाई सरकारले कोरोना संक्रमण रोकथाम गर्न सुचना उपलब्ध गराउन अनुरोध गरेको थियो । सबैभन्दा बढी समुहमा संक्रमण फैलिएको थेगु स्थित उक्त सम्प्रदायका धर्मगुरुले झुटा विवरण उपलब्ध गराएर सरकारलाई असहयोग गरेको आरोप सरकारले उनीमाथि लगाएको थियो ।

लीले तारेखमा रिहा हुन अदालत समक्ष सेप्टेम्बर १८ मा निवेदन पेश गरेका थिए । उनको उक्त निवेदन उपरको बहसका क्रममा सुवन जिल्ला अदालतले १०० मिलियन वन धरौटीमा तारेखमा रिहा गर्न आदेश दिएको थियो ।

लीले सुचनामा तलमाथि गराएका यथेष्ट प्रमाण नपाइएको तथा उनको स्वास्थ्य दिनप्रतिदिन खराब बन्दै गएका कारण रिहा गरिएको श्रोतले बताएको छ । अदालतको आदेश पश्चात ली ह्वील चेयरमा जेलबाट बाहिर आएका थिए ।