कोरियामा पोल्ट्रीजन्य बस्तुको आयात बन्द

सोल – दक्षिण कोरियाले नेदरल्याण्डबाट हुने पोल्ट्रीजन्य बस्तुको आयातमा प्रतिबन्ध लगाएको छ । नेदरल्याण्डमा बर्डफ्लु रोगको संक्रमण पाइए पश्चात उक्त संक्रमण दक्षिण कोरिया भित्रीन नदिन सरकारले त्यहाँबाट हुने पोल्ट्री आयत पूर्ण रुपमा बन्द गराएको हो ।

नेदरल्याण्ड सरकारले त्यहाँको गिल्डरल्याण्ड प्रान्तको एक कुखुरा फार्ममा बिहिबार मात्र एभियन इन्फ्लुएञ्जा (एआई) नामक भाइरस पाइएको बताएको थियो । उक्त भाइरस पाइए लगत्तै दक्षिण कोरियाली कृषि मन्त्रालयले त्यहाँबाट हुने सम्पुर्ण पोल्ट्री तथा पोल्ट्रीजन्य पदार्थको आयातमा रोक लगाएको हो ।

मन्त्रालयले चीन, ताइवान तथा अन्य युरोपेली मुलुकहरुमा समेत त्यस किसिमका फ्लुहरु पाइएको बताउदै मन्त्रालयले ति मुलुकहरुबाट हुँदै आएका आयातमा समेत कडा नियमन भइरहेको बताएको छ । आवश्यक परेमा ति मुलुकहरुबाट हुँदै आएका निर्यात समेत बन्द गरिने मन्त्रालयले बताएको छ ।

यता दक्षिण कोरियाली सरकारले देशमै पनि जंगली चराहरुमा एच-५ एन-८ नामक भाइरस पाइएका कारण सचेत रहन सबै सरोकारवालाहरुमा अनुरोध समेत गरेको छ ।