जापानको जन्मदर १२० बर्षकै न्यून

टोकियो – सन् २०२० मा जापानमा जन्मदरमा ब्यापक गिरावट आउने सरकारी श्रोतले बताएको छ । सरकारी श्रोतले बताए अनुसार यस बर्षको डिसेम्बर सम्ममा ८ लाख ४५ हजार हाराहारीमा नयाँ बच्चाहरुको जन्म हुने प्रक्षेप्पण गरिएको छ ।

यस अघि सन् २०१९ मा ८ लाख ६५ हजार २३९ जनाको जन्म भएको थियो जुन १२० बर्ष यताकै कम दर थियो । यस बर्ष उक्त संख्या भन्दा कम जन्मदर रहने अनुमान गरिएको छ ।

जापानमा सन् २०१६ यता १ बर्ष कमका शिशुहरुको संख्या १० लाख पुग्न सकेको छैन । विवाह गर्न नमान्ने तथा ढीलो विवाह गर्ने नयाँ पद्दतिका कारण जन्मदरमा गिरावट आएको त्यहाँको स्वास्थ्य, श्रम तथा समाजकल्याण मन्त्रालयले बताएको छ ।

यस बर्ष कोरोना भाइरस संक्रमणका कारणबाट समेत जन्मदरमा असर परेको हुनसक्ने मन्त्रालयले बताएको छ । यस बर्षको पहिलो ६ महिनामा जन्मदर २.३ प्रतिशत रहेता पनि पछिल्लो ६ महिनामा गर्भावति महिलाहरुको संख्या समेत गर्दा पनि न्युन रहेको मन्त्रालयले बचाएको छ ।