कोरियामा रोजगारी गुमाउने मध्ये अस्थायी र करारका कामदार उच्च

सोल – दक्षिण कोरियामा कोरोना संक्रमणका कारण स्थायी कामदार भन्दा अस्थायी तथा करारका कामदारहरुको जागिर गुमाउने दर उच्च देखिएको छ ।

हालै गरिएको एक अध्ययन अनुसार प्रत्येक ३ अस्थायी तथा करारका कामदार मध्ये १ जनाको रोजगार गुमेको छ ।

अधिवक्ताहरुको समुह ‘गाब्जील ११९’ ले हालै १ हजार जनामा गरेको एक अध्ययन अनुसार १५.१ प्रतिशतले कोरोना संक्रमणका कारण आफूहरुले जागिर गुमाएको बताएका छन् ।

उक्त संख्या मध्ये करिव ३२ प्रतिशत करारका कामदारहरुले संक्रमणकै कारण रोजगारी गुमेको बताएका छन् भने ४.३ प्रतिशत पूर्णकालीन कामदारहरुले समेत जागिर गुमेको बताएका छन् ।

त्यस्तै गरि करिव ३० प्रतिशतले आफ्नो आमदानी १५ लाख वन भन्दा कम रहेको बताएका छन् भने ३ प्रतिशतले आफ्नो आमदानी ५० लाख वन आसपास रहेको बताएका छन् । उक्त अध्ययन अनुसार जागिर गुमाउनेहरु मध्ये २१ प्रतिशतलाई राजिनामा दिन लगाइएको छ भने १९.९ जनालाई स्वेच्छिक अवकास दिइएको छ ।

उक्त अध्ययन अनुसार १९.२ प्रतिशतको करार अवधि सकिएका कारण रोजगार गुमेको छ भने १३.२ प्रतिशतको ब्यवस्थापकीय समस्याका कारण रोजगारी गुमेको छ ।

रोजगार गुमाउने मध्ये ८० प्रतिशतले बेरोजगार सुविधा नपाएको बताएका छन् भने ५४ प्रतिशतले रोजगार बीमा कार्यक्रममा सहभागी नभएका कारण सुविधा पाउनबाट बञ्चित भएका छन् ।

उक्त अध्ययन अनुसार कोरोना संक्रमणको पछिल्लो ८ महिनामा बेरोजगारीको समस्या बाहेक मानिसहरुमा मानसिक समस्या आएको पाइएको बताएको छ । उक्त अध्ययनमा सहभागी अधिकांशले आफूहरुमा मानसिक समस्या सुरु भएको बताएका छन् । अनिद्रा, तनाव लगायतका समस्याहरु आफूमा आएको उनीहरुले बताएका छन् ।