दक्षिण कोरियामा कोरोना प्रभावित ब्यवसायीलाई सहुलियत ऋण

सोल – दक्षिण कोरियामा कोरोनाबाट बढी प्रभावित बनेका साना तथा मझौला व्यवसायीहरुलाइ सहयोग गर्न सरकारले ऋण ब्यवस्थामा परिमार्जन गर्ने भएको छ । आकस्मिक ऋण योजना अनुरुप अब साना तथा मझौला ब्यवसायीहरुले सरल रुपमा ऋण पाउने भएको सरकारको अर्थ मन्त्रालयका अधिकारीले बताएका छन् ।

अर्थ राज्यमन्त्री किम योङ ब्योमका अनुसार हालको नयाँ ब्यवस्था अनुसार अब ब्यवसायीले १० मिलियन वोनबाट सिधै २० मिलियन वोन सम्म लोन निकनल्न सक्ने छन् । सरकारको गत मार्च महिनामा लागु भएको १० मिलियन वोन योजनामा सहभागी भएर लोन लिएकाहरुले समेत थप १० मिलियन लोन लिन सक्ने राज्यमन्त्री किमले बताए ।

ब्यवसायीले सरकारलाइ उपलब्ध गराएको आफ्नो ब्यापारिक क्षतिको आधारमा उक्त लोन लिन सकिने उनले बताएका छन् । लोन ब्यवस्थापनका लागि बिभिन्न १२  बैंकहरुसँग सहकार्य गरिने समेत उनले बताएका छन् । साना ब्यापारिहरुका हकमा भने सरकारसँग क्षतिको विवरण उपलब्ध नभएका कारण उनीहरुले उपलब्ध गराएको बिवरणका आधारमा सहुलियत दिइने राज्यमन्त्री कीमले बताएका छन् ।

पछिल्लो पटक कोरोना संकट बढे पश्चात सरकारले देशब्यापि निषेधाज्ञा लागु गरेपछि देशभरका साना तथा मझौला व्यवसायीहरु आर्थिक रुपमा धरासायी बनेका छन् । संकट बढ्दै गएपछि सरकारले चौथो पटक ७.८ ट्रिलियन वोनको पुरक बजेट समेत ल्याइसकेको छ ।