दक्षिण कोरियामा आँधीको बितण्डा, ठूलो क्षति भएको आशंका (फोटो फिचर)

सोल – दक्षिण कोरियाले सोमबार यस बर्षकै ठूलो समुद्री आँधी हैसेनको सामना गरेको छ । देशको दक्षिण सिमा हुँदै गएको उक्त आँधीले छेजु आइल्याण्ड क्षेत्रमा ठूलो क्षति पुर्याएको समाचारमा बताइएको छ ।

आँधीमा परि १ जना हराइरहेका छन् भने सैयौँको संख्यामा मानिसहरु घाइते भएका छन् । देशको दक्षिणी क्षेत्रमा सडक यातायात अबरुद्ध भएको छ भने धेरै स्थानमा भौतिक क्षति तथा विद्युत सेवा अबरुद्ध भएको छ ।

बिहान ९ बजेबाट सुरु भएको उक्त आँधी ६० किमी प्रतिघण्टाको रफ्तारमा आएको थियो । आँधीका कारण उल्सन, छेजु, ग्याङवान, बुसन, जियोङ्जी, उत्तरी ग्योङसाङ लगायतका क्षेत्रमा बढी प्रभाव परेको छ । ति क्षेत्रका आणविक प्लान्टहरु बन्द गरिएका छन् भने २ वटा पावर टर्वाइनहरु समेत बन्द गरिएका छन् ।

देशको केन्द्रीय आपतकाल व्यवस्थापन विभागका अनुसार आँधीका कारण १०८७ घर परिवार बिस्थापित भएका छन् । ३७ बढी राजमार्गहरुमा सवारी आवागमनमा बन्देज लगाइएको छ भने दक्षिण र पूर्व जोड्ने रेलसेवा समेत बन्द गरिएको छ ।

आँधीकै कारण ११८ वटा फेरी, ६०७ वटा पदमार्ग, २१ वटा राष्ट्रिय निकुञ्ज तथा २९८ वटा आन्तरिक उडान समेत बन्द गरिएका छन्

उक्त आँधीका कारण जापानमा समेत ब्यापक क्षति भएको बताइएको छ । ५० भन्दा बढी ब्यक्तिहरु घाइते भएका छन् भने ठूलो संख्यामा धनमालको क्षति भएको जापानी समाचार संस्थाहरुले बताएका छन् ।