लकडाउन तथा कडा सिमा सुरक्षा विच केही उत्तर कोरियाली नागरिक भागेर दक्षिण कोरिया पुगे

सोल – उत्तर दक्षिण सिमा क्षेत्र सुरक्षाका हिसावले अत्यन्तै संवेदनशील मानिन्छ । उक्त क्षेत्र पार गर्नु असम्भव प्राय मानिन्छ । सैनिकको कडा सुरक्षा निगारानी सहजै देख्न सकिने उत्तर दक्षिण सिमा क्षेत्र लकडाउन तथा उत्तर दक्षिण सिमा विवादका कारण थप निगारानीमा रहेको छ ।

कडा सिमा सुरक्षाका विच पनि केही उत्तर कोरियाली नागरिकहरु भागेर दक्षिण कोरिया आइपुगेका छन् । समाचार अनुसार यस बर्षको दोश्रो चौमासिकमा बर्षकै कम उत्तर कोरियाली नागरिकहरु लुकिछिपि दक्षिण प्रवेश गरेका हुन् ।

दक्षिण कोरियाली एकिकरण मन्त्रालयका अनुसार गत अप्रिल महिनामा सात जना उत्तर कोरियाली नागरिक दक्षिण कोरिया आएका छन् । मे महिनामा उक्त क्रम जारी रहदै थप दुई जना तथा जुन महिनामा ३ जना गरि जम्मा १२ जना उत्तर कोरियाली नागरिकहरु दक्षिण कोरिया आएका छन् । मन्त्रालयका अनुसार उक्त दर सन् २००३ यताकै कम हो । यसै बर्षको पहिलो चौमासिकमा १३५ जना उत्तर कोरियाली नागरिकहरु दक्षिण कोरिया आएको पनि मन्त्रालयले बताएको छ ।

हालको विसम परिस्थिति, अन्य देशहरु सँग सम्पर्क विच्छेदको अवस्था, कडा सिमा सुरक्षा व्यवस्थापन, विश्वव्यापी लकडाउन जस्ता सिमा क्षेत्रमा कडाई हुने अनेकौ काम भइरहेको बेला ति नागरिकहरुको प्रवेश आश्चर्यजनक रहेको समेत मन्त्रालयले बताएको छ ।

मन्त्रालयले यस बर्ष कम्तिमा पनि ३५० जना उत्तर कोरियाली नागरिक दक्षिण कोरिया आउन सक्ने आँकलन समेत गरेको छ ।