कोरियाली युद्धमा मारिएका १४७ सैनिकहरुको अवशेष दक्षिण कोरिया ल्याइयो

सोल-सन् १९५०-५३ मा भएको दुई कोरिया विचको युद्धमा मारिएका १४७ जना दक्षिण कोरियाली सैनिकहरुको अवशेष दक्षिण कोरिया ल्याइएको छ ।

उत्तर कोरियाली क्षेत्रमा मारिएका उनीहरुको अवशेष गत बुधवार स्वदेश ल्याइएको हो ।

युद्धमा मारिएका सैनिकहरुलाई अमेरिकी सैनिकको स्क्याभेटरले पत्ता लगाएको थियो । डीएनए परीक्षण गर्न अमेरिका लगिएका उनीहरुको शरीरको अवशेष दक्षिण कोरिया ल्याइएको हो ।

दक्षिण कोरियाको रक्षा मन्त्रालयले युद्धको ७० औँ वर्षको अवसरमा देशका सच्चा हिरोहरुलाई देशमा भित्र्याउदा उच्च सम्मान अर्पण भएको बताएको छ ।

ती योद्धाहरुका अवशेषलाई दक्षिण कोरियाको राष्ट्रिय झण्डा ओढाएर स्वदेश ल्याइएको थियो ।

यस अघि पनि सन् २०१२ मा १२ जना, सन् २०१६ मा १५ जना तथा सन् २०१८ मा ६५ जना कोरियाली युद्धका योद्धाहरुका अवशेष प्राप्त गरि स्वदेश ल्याइएको थियो ।

कोरियाली अधिकारीहरुका अनुसार उक्त खोज अमेरिकी सैनिकले उनीहरुका हराएका सैनिक खोज्ने क्रममा गरेका थिए ।