कोरियाली युद्धको ७० बर्ष- उत्तरलाई सैन्य सम्झौता पालना गर्न आग्रह

सोल-दक्षिण कोरियाका रक्षा मन्त्री ज्योङ कियोङ डु तथा अमेरिकी रक्षा सचिव मार्क इस्परले कोरियाली प्रायद्वीपमा शान्ति स्थापना गर्न सन् २०१८ मा गरिएको सैन्य सम्झौतालाई अक्षरस्स पालना गर्न भनेका छन् ।

विहिवार संयुक्त वक्तव्य मार्फत उनीहरुले कम्युनिष्ट राज्य उत्तर कोरियालाई सम्झौता प्रति जिम्मेवार हुन भनेका छन् ।

सन् १९५०-५३ मा भएको कोरियाली युद्धको ७० औँ बर्षगाँठ पुगेको अवसरमा दुबै देशका उच्च अधिकारीहरुले उत्तर कोरियालाई आफूले गरेका वाचा प्रति कटिवद्ध हुन र जिम्मेवार भएर प्रस्तुत हुन समेत भनेका छन् ।

वक्तव्यमा उत्तर कोरियालाई आणविक हतियार मुक्त राष्ट्र बनाउन भइरहेका प्रयासलाई निरन्तरता दिने समेत उल्लेख गरिएको छ । उक्त वक्तव्यमा सेप्टेम्बर १९ मा गरिएको सिङ्गापुर सम्झौतालाई समेत गम्भिरतापूर्वक लउन भनिएको छ ।

कोरियाली प्रायद्वीपमा द्वन्दात्मक स्थिति सृजना भएको करिव एक हप्ता पश्चात यो दिन आएको बताउदै आगामी दिनहरुमा शान्तिपुर्ण तरिकाले अगाडी बढ्न समेत उनीहरुले भनेका छन् ।

पछिल्ला दिनहरुमा दुई कोरियाको सिमा क्षेत्रमा उत्तर कोरिया विरुद्ध पर्चावाजी गरिए सँगै उत्तर कोरिया रुष्ट बनेको छ । उसले सोही घटनाका कारण दक्षिण सँगको सूचना केन्द्रलाई बन्द मात्र गराएन, ध्वस्त नै बनायो भने पछिल्ला दिनहरुमा सैन्य गतिविधि पनि बढाएको छ ।

अबका दिनहरुमा कोरियाली प्रायद्वीपमा शान्ति र स्थिरता कायम गर्दै आर्थिक विकासको मार्ग तर्फ अगाडी बढ्नुपर्ने उनीहरुद्वारा जारी संयुक्त वक्तव्यमा उल्लेख गरिएको छ ।