दुई कोरियाको बेलुन पर्चा काण्ड-उत्तरबाट भागेकाले नै उडाए किम बिरोधी पर्चा

सोल- उत्तर कोरियाबाट देश निकाला गरिएका नागरिकहरुको एक समुहले उत्तर कोरियासँगको सिमा क्षेत्रबाट नेता किम बिरोधी पर्चा पठाएका छन् ।

दक्षिण कोरिया सरकारले उक्त कार्यमाथि प्रतिवन्ध लगाए पनि आफूहरुले उत्तर तर्फ प्योङयाङ विरोधी पर्चा पठाएको उनीहरुले बताएका छन् ।

उत्तर कोरियामा नागरिक स्वतन्त्रता हुनुपर्ने माग राख्दै आन्दोलन गरिरहेका मध्येका छ जनाले सोमबार मध्य रात ११ बजे उत्तर दक्षिण सिमा क्षेत्रको खान्गी प्रान्तको पाजु शहरबाट उत्तर कोरिया विरोधी पर्चा उडाएको दक्षिण कोरियाली सञ्चार माध्यम द कोरियन हेराल्डमा बताइएको छ । उक्त जानकारी समुहका प्रमुख पार्क साङ हाकले बताएका छन् ।

पार्कले दिएको जानकारी अनुसार ठूला ठूला २० वटा हिलियम बेलुनको साहायतामा उत्तर तर्फ पर्चा पठाइएको छ ।

उनका अनुसार बेलुनमा ५ लाखवटा उत्तर बिरोधि पर्चा जसमा ‘कोरियाली युद्धको सत्यता’ बारे लेखिएको छ, १ अमेरिकी डलर का २००० थान नोट, १००० थान एसडी कार्ड तथा ५०० ससाना पर्चाहरु पठाइएको छ । उनले प्रहरी गिरफ्तारीबाट बच्न राति बेलुन उडाएको तथा उक्त अभियानमा प्रहरीबाट बच्न नयाँ सदस्यहरुलाई समावेश गराईएको थियो ।

दक्षिण कोरियाली प्रहरीले मंगलवार विरोधीहरुले प्रयोग गरेका भनिएको मध्येको एक बेलुन खाङवन प्रान्तको हङचियोन गाउमा भेटिएको बताएको छ ।

उक्त स्थान प्रदर्शनकारीले उडाएको भनिएको क्षेत्र भन्दा करिव १०० किलोमिटर पुर्व तर्फ पर्दछ ।

प्रहरीले बरामत गरेको उक्त बेलुनको साथबाट ठूलो संख्यामा पर्चा समेत पाइएको छ । उक्त पर्चामा उत्तर कोरियाली तानाशाह किम जोङ उन, उनकी बहिनी किम यो जोङ तथा उनीहरुका हजुरबुबा किम इल सुङको तस्विर छापिएको छ । पर्चामा उनीहरुको चस्विर सँगै उत्तर विरोधी नारा समेत लेखिएको छ ।

उक्त घटना बारे बोल्दै दक्षिण कोरियाको एकिकरण मन्त्रालयले भने ति प्रदर्शनकारीहरुले बेलुन उडाएको समाचारमा सत्यता नभएको बताएको छ ।

यदि उनीहरुको समुहले उडाएको भएता पनि बेलुन उत्तर कोरिया नपुगेको उनको भनाई छ । मन्त्रालयले यदि बेलुन उडाएको पाइएमा ति उत्तर विरोधि अभियानका अभियान्ताहरुलाई कानुनी कारवाही गरिने समेत स्पष्ट पारेको छ ।