‘भारतीय सैनिकलाई सबै कदम चाल्न अनुमति दिइएको छ ‘ -भारतीय रक्षामन्त्री सिंह

नयाँ दिल्ली- भारतीय रक्षामन्त्री राजनाथ सिंहले चीनसँगको सिमा जोडिएको लद्धाख क्षेत्रको पछिल्लो अवस्था बारे जानकारी लिएका छन् ।

सुरक्षा परिषदका उच्च अधिकारीहरुको विशेष बैठक राख्दै उनले गल्याङ उपत्यकाको पछिल्लो सुरक्षा स्थिति बारे जानकारी लिएका हुन् ।

बैठकमा भारतीय रक्षा विभागका जेनरल विपिन रावतले पछिल्लो अवस्था बारे रक्षा मन्त्रीलाई जानकारी गराएका हुन् । बैठकमा एमएम नरभाने, जलसेना प्रमुख करमवीर सिंह, हवाई सेना प्रमुख आरकेएस भादौरिया लगायतको सहभागिता रहेको थियो ।

बैठक रक्षा मन्त्रीको रुस भ्रमणको एक दिन अगाडी भएका कारण पनि महत्वपुर्ण रहेको अधिकारीहरुले बताएका छन् । २० जना सैनिकको मृत्यु भएको तथा ७६ जना घाइते हुने गरि भएको उक्त सिमा विवाद पश्चात हुन लागेको यो भ्रमणलाई महत्वका साथ हेरिएको छ ।

भारतीय रक्षा मन्त्री रुसको राजधानी मस्कोमा आयोजना हुन लागेको एक समारोहमा भाग लिन त्यहाँ जादै छन् । रुसले दोश्रो विश्वयुद्धमा जर्मनी माथि विजय प्राप्त गरेको ७५ औँ बर्ष पार गरेको अवसरमा आयोजना गरिन लागिएको विजय उत्सवमा आतिथ्यता ग्रहण गर्न उनी त्यता तर्फ जान लागेका हुन् ।

बैठकमा उनले देशको सार्वभौमसत्ताको रक्षा गर्न भारतीय सैनिकलाई आवश्यक जस्तो सुकै कदम चाल्न अनुमति दिइएको समेत रक्षा मन्त्रीले बताएका छन् ।

उनले हरेक राष्ट्रलाई आफ्नो सार्वभौमसत्ता र राष्ट्रीय अखण्डता प्यारो हुने बताउदै सो को लागि सरकारको पूर्ण समर्थन हुने समेत स्पस्ट पारेका छन् ।

पछिल्ला दिनहरुमा सैनिक उच्च अधिकारीहरुले वार्ता मार्फत समस्याको समाधान गर्न पहल गरिरहेकाले अवस्था अब सामान्य तर्फ जाने समेत उनले बताएका छन् ।