उत्तर कोरिया अमेरिकाको ‘असहयोगी राष्ट्र’को सूचीमा

सोल-अमेरिकाको राज्य सरकारले आतङ्कवाद विरुद्धको लडाइमा असहयोग गरेको भन्दै उत्तर कोरिया सहित ४ अन्य देशहरुलाई ‘असहयोगी राष्ट्र’ को सुचीमा सुचिकृत गरेको छ ।

यसका साथ साथै अमेरिकाले ती देशहरुमा सुरक्षासँग सम्बन्धित उपकरण तथा साधनको विक्री वितरणमा समेत रोक लगाएको छ ।

अमेरिकाले उत्तर कोरियालाई सो सूचीमा सन् १९९७ बाट राख्न सुरु गरेको हो । ततपश्चात अमेरिकाको उक्त सूचीमा उत्तर कोरिया निरन्तर परिरहेको छ । सन् २०१९ बाट ईरान, सिरिया, भेनेजुवेला तथा क्युवा समेत समावेश भएका छन् । अमेरिकामा सो सुची हतियार निर्यात नियन्त्रण ऐन अनुसार तयार गरिन्छ ।

अमेरिकी अधिकारीहरुका अनुसार सन् १९७० मा जापानको एक वायुसेवा कम्पनिको विमान अपहरण मुद्धा लागेका ४ जना जापानी नागरिकहरु उत्तर कोरियाले लुकाएर राखेको उसले पत्रकार सम्मेलनमा नै जानकारी दिएको छ । जापान सरकारले पनि आफ्नो देशका १२ जना संदिग्ध अपराधिहरु सन् १९७०/८० बाट नै उत्तर कोरियामा रहदै आएको जनाएको छ ।

अमेरिकाले उत्तर कोरियालाई कालो सुचीमा राखेको घटनाले उत्तर कोरियालाई भने असर नगर्ने बताइन्छ । उस माथि पहिलेबाट नै विभिन्न राष्ट्रहरुको नाकाबन्दी रहेका कारण यो सुचिकरणले खासै महत्व भने नदिने विज्ञहरु बताउछन् ।

अमेरिकाले उत्तर कोरियालाई आतङ्कवादको प्रायोजकको संज्ञा समेत दिइसकेको छ ।