अमेरिकी राष्ट्रपति र उपराष्ट्रपति कोरोनाको उच्च जाखिममा, नजिकका सहयोगी नै संक्रमित

एजेन्सी – अमेरिकी राष्ट्रपति डोनाल्ड ट्रम्प र उपराष्ट्रपति माइक पेन्सी कोेरोना भाईरसको उच्च जोखिममा परेका छन् । अमेरिकी उपराष्ट्रपति माइक पेन्सी प्रेस सेक्रेटरी केटी मिलर कोरोना भाइरसबाट संक्रमित भएकी छन्।

शुक्रबार उनमा कोरोना भाइरसको संक्रमण रहेको पुष्टि भएको हो । त्यसको दुई दिनअघि राष्ट्रपति डोनाल्ड ट्रम्पका सहयोगीलाई पनि कोरोना भाइरस रहेको पुष्टि भएको थियो ।

राष्ट्रपति कार्यालय ह्वाइट हाउसले उपराष्ट्रपति पेन्स र राष्ट्रपति ट्रम्पमा कोरोना भाइरसको संक्रमण रहे–नरहेको थाहा पाउनका लागि दैनिक परीक्षण गर्न थालेको छ । राष्ट्रपतिलाई सुरक्षित राख्नका लागि हरेक उपायहरु अपनाइएको ह्वाइट हाउसले जनाएको छ ।

कोरोना भाइरस महामारीका कारण सबैभन्दा बढी प्रभावित भएको अमेरिकामा अहिलेसम्म कोभिड–१९ बाट ७८ हजार भन्दा बढीको ज्यान गइसकेको छ । यस्तै संक्रमितको संख्या पनि अमेरिकामा १३ लाख २१ हजार भन्दा बढी पुगेको छ ।

शुक्रबार उपराष्ट्रपति पेन्स आयोवामा धार्मिक नेतासँगको भेटका लागि गएका थिए ।