जापान सरकारले कोरोना विरुद्ध इबोलाकै औषधि प्रयोग गर्न अनुमति दियो

टोकियो- जापान सरकारले कोरोनाका विरामीहरुको उपचारार्थ एण्टी भाइरल औषधि रेमेडेभिर प्रयोग गर्न अनुमति दिएको छ । जापान सरकारले यसै महिना अवीगन नामक अर्को औषधि कोरोना संक्रमितहरुलाई प्रयोग गर्न अनुमति दिएको थियो ।

यस सँगै कोरोनाको सघन उपचार गराईरहेका बिरामीहरुलाई सो संक्रमण बिरुद्ध रेमेडेभिर औषधि प्रयोग गर्ने जापान दोश्रो मुलुक बनेको छ । गत मे महिनाको १ तारिखमा अमेरिकाले सो औषधि कोरोना विरुद्ध प्रयोग गर्न अनुमति दिइसकेको छ ।

गत हप्ता मात्र जापानी प्रधानमन्त्री सिञ्जो आवेले कोरोना संक्रमितहरुका लागि शुभ समाचार ल्याउने औषधिको प्रयोग निकट भविष्यमा नै प्रयोग गरिने बताएका थिए ।

अमेरिकामा ईबोला बिरुद्ध प्रयोग गरिदै आएको उक्त औषधि कोरोना संक्रमितहरुमा पनि प्रभावकारी देखिएका कारण प्रयोग गर्न अनुमति दिइएको थियो ।

जापान सरकारले जापानमा नै बनेको औषधि अवीगनको प्रयोगमा पनि अनुमति दिएको छ सन् २०१४ मा निर्मित उक्त औषधि फ्लुका बेला प्रयोग गरिएको थियो ।

यो औषधि हाल बजारमा छैन । अधिकारीहरुका अनुसार उक्त औषधि उत्पादनका लागि कम्पनिले जापान सरकारको अनुमति लिनुपर्दछ । हाल सो औषधि परीक्षणकै क्रममा रहेको र यदि प्रभावकारी रहेमा उत्पादन सुरु गरिने पनि अधिकारीले बताएका छन् ।