दक्षिण कोरियाली सञ्चार माध्यमको उत्तर कोरियाद्वारा आलोचना

सोल- उत्तर कोरियाली सर्वोच्च नेता किम जोङ उन करिव २० दिन सर्वसाधारण जनताको नजर बाहिर बसे । उनको सो बसाईको उद्देश्य के थियो अथवा वास्तविकता के थियो कसैलाई थाहा छैन ।

सञ्चार माध्यमबाट उन टाढा बसेकै कारण विश्वभरका सञ्चार माध्यम उनी तिर नै एकतृत भए । कसैले मुटुको जटिल शल्यक्रिया भएको बताए, कसैले किम गम्भिर विराकी भएको बताए त कसैले किमको मृत्यु भइसकेको र खबर केही दिनमै बाहिरिने भनेर ठोकुवा सहितका समाचार प्रसारण गरे ।

विश्वभरका सञ्चार माध्यमहरुलाई गलत सावित गर्दै किम जोङ उन गत १ मे मा एक रासायनिक मल उत्पादन गर्ने उद्योगको उद्घाटन समारोहमा सहभागी बने ।

सो भिडियो उत्तर कोरियाको सरकारी टेलिभिजनले प्रसारित गरेपछि सामाजिक सञ्जालमा भाइरल समेत भयो । अप्रिल ११ यता चुपचाप बसेको उत्तर कोरियाली सञ्चार माध्यम किमको उपस्थिति सँगै जुर्मुराएको छ ।

हालै उत्तर कोरियाको सरकारी वेवसाइटले सम्पुर्ण विदेशी र विशेषत: दक्षिण कोरियाली सञ्चार माध्यमको कटु आलोचना सहितको समाचार प्रकाशित गरेको छ ।

सो वेबसाइटमा भ्रामक समाचार सम्प्रेषण्ले जनतामा द्विविधा सृजना गरेको उल्लेख गर्दै ‘संकीर्ण सोच भएका कोरियाली सञ्चारमा झुटको समाचारको बजार’ शिर्षकमा प्रकाशित गरेको छ ।

दक्षिण कोरियाले आफ्ना सिमित सामाजिक आर्थिक तथा राजनैतिक लाभका लागि जनतामा उत्तर विरोधी भ्रम सृजना गर्न त्यस्तो झुटको खेति गरेको बताउदै त्यस्ता झुटको आयु धेरै नहुने समेत बताएको छ ।

उसले दक्षिण कोरियाले झुट समाचारलाई पनि सत्य बनाउन अनेक प्रपञ्च रचेको आरोप लगाउदै लेख्दैमा झुट सत्य सावित हुन नसक्ने चेतावनी समेत दक्षिणलाई दिएको छ ।