दक्षिण कोरियामा कोरोना संक्रमणकै विच संसदीय चुनाव,घरबाटै मतदान

सोल- दक्षिण कोरियामा कोरोनाको संक्रमण दर केही कम भएता पनि पूर्ण रुपमा रोकिएको छैन । तर कोरियाली निर्वाचन आयोगका अनुसार कोरियाको संसदीय चुनाव भने कोरोना संक्रमणका कारण रोकिने छैन ।

अधिकारीका अनुसार निर्वाचन तोकिएकै मिति अर्थात अप्रिल १५ मा नै हुने छ । आयोगका अनुसार निर्वाचनका लागि उसले १४,३३० वटा निर्वाचन केन्द्रहरु समेत तोकिसकेको छ ।

निर्वाचन अधिकारीहरुका अनुसार निर्वाचनलाई सबै नागरिकको पहुँचमा राख्न ९९.१ प्रतिशत मतदान केन्द्रहरु भुई तल्लामा नै व्यवस्थित गरिएको तथा बाँकीमा लिफ्टको व्यवस्था गरिएको जनाइएको छ ।

कोरोना संक्रमणको माहामारीका बीच निर्वाचन आयोजना गरिएता पनि सर्वसाधारण जनताले आत्तिन नपर्ने आयोगले जनाएको छ । आयोगका अनुसार मतदान केन्द्रमा हरेक मतदाताहरुको वीचमा कम्तिमा एक मिटरको दुरी कायम गरिने छ ।

हरेक मतदाताले अनिवार्य मास्क लगाउनु पर्नेछ भने मतदान स्थल प्रवेश पूर्व हरेक नागरिकको तापक्रम परिक्षण गरिने छ र यदी कसैमा शका लागेमा उसलाई छुट्टै स्थलबाट मतदान गराइने छ । मतपेटीका तथा मतपत्र दुबैमा डिस्इनफेक्सन छर्किइने छ भने मतदान खुल्ला वातावरणमा गराइने छ ।

अधिकारीहरुका अनुसार कोरोना संक्रमणका कारण आइसोलेशन तथा क्वारेन्टाइनमा बसेका नागरिकहरुका लागि पनि आयोगले छुट्टै व्यवस्थापन गरेको छ । यदि उनीहरुले मार्च २४ बाट २८ सम्म आवेदन दिएमा उनीहरुलाई इमेल भोटिङ सुविधा उपलव्ध गराइने छ ।

त्यस्तै गरि मतदान स्थलसम्म आउन नसक्नेहरुका लागि भनेर सरकारले घरबाट नै मतदान गर्ने व्यवस्था मिलाएको छ । हालसम्म १०,५३० जनाले सो को लागि निवेदन दिएका छन् ।