कोरियाका अधिकांश पार्क बन्द हुने

सोल-कोरियामा कोरोना संक्रमण १० हजार हाराहारी पुग्दा कोरियाली राजधानी सोल शहरमा अवस्थित पर्यटकहरुको आकर्षणको केन्द्र समेत रहेको सियोक्चेन लेक पार्क आगामी अप्रिल १२ सम्म बन्द गरिने भएको हो ।

सोल शहरको दक्षिण पश्चिमि क्षेत्रमा अवस्थित उक्त पार्क कोरोना संक्रमणको बढ्दो त्राशका कारण बन्द गरिएको उक्त वार्डका प्रमुख पार्क सुङ सू ले फेसवुक मार्फत जनाएका छन् । गत शनिवारबाट बन्द गरिएको उक्त पार्क अप्रिल १२ पछि स्थिति हेरेर पुनः सञ्चालनमा ल्याइने उनले बताएका छन् ।

वार्डका प्रमुख पार्क सुङ सूका अनुसार उक्त पार्क भएर स्थानीय नागरिकहरु ओहोर दोहोर समेत गर्ने भएका कारण नियमित रुपमा विहान ५ बजे बाट ९ बजे सम्म आवत जावतका लागि खुल्ला गरिने समेत उनले जानकारी दिएका छन् ।

उनका अनुसार सो निर्णय कोरियाली सरकारको दुरी कायम राखेर रोग सँग लड्ने अभियानकै निरन्तरताको रुप हो ।

यो मौसम कोरिया का विभिन्न स्थानहरुमा चेरी फूल्ने समय हो । चेरीको सुन्दरतालाई नियाल्न यो समयमा कैयौँ मानिसहरु चेरी पार्कहरुमा आउने गर्दछन् ।

जसका कारण कोरियामा चेरी फेस्टिभल नै चल्दछ । तर यस बर्ष कोरोना संक्रमणका कारण कोरियाका धेरै स्थानहरु प्रभावित बनेका कारण योउइदो, चाङवन तथा अन्य शहरमा रहेका चेरी पार्कहरुमा चेरी फेस्टिभल नगरिने समाचारमा बताइएको छ ।

स्मरण रहोस्, कोरियामा कोरोना संक्रमण बाट हाल सम्म ९३३२ जना संक्रमित बनेका छन् भने १४८ जनाले सोहि रोगका कारण ज्यान गुमाइसकेका छन् ।