किम जोङ उनकी कान्छी बहिनी शक्तिशाली बन्दै

प्योङयाङ-उत्तर कोरियाली सर्वोच्च नेता किम जोङ उनकी बहिनी हाल पहिले भन्दा बढी शक्तिशाली बन्दै गएको उत्तर कोरिया निकटका सञ्चार माध्यमहरुले बताएका छन् ।

समाचारमा जनाइए अनुसार किम जोङ उनकी बहिनी किम यो जोङ उत्तर कोरियाको वर्कस पार्टीमा पहिले भन्दा शक्तिशाली बन्दै गइरहेको समाचार बाहिर आउन थालेका छन् । उनले पार्टीमा विभिन्न आदेशहरु दिने गरेको खबरहरुमा बताइएको छ ।

विश्लेषकहरुका अनुसार उनको कुटनैतिक क्षेत्रमा पहिलेबाट नै केही हुकुमी शैली रहेको थियो तर हालका दिनहरुमा उनी सो क्षेत्रमा अझ शशक्त रुपमा देखिएकी छन् ।

समाचारमा जनाइए अनुसार जव किम जोङ उन कुनै कामले प्योङयाङ बाहिर जान्छन्, यो जोङ किमको कार्यकारीको रुपमा पार्टी तथा सरकारको देखभाल गर्ने गर्दछिन् । हाल उनीलाई पार्टीको पहिलो सह निर्देशकको रुपमा हेरिन थालिएको भएता पनि औपचारिक रुपमा भने उनको नाम घोषणा गरिएको छैन ।

पहिला उनलाई प्रोपोगाण्डा तथा एजिनेशन विभागको जिम्मेवारी तोकिएको थियो भने हाल उनीलाई सो भन्दा शक्तिशाली अर्गनाइजेशन एण्ड गाइडेन्स विभागको जिम्मेवारी दिइएको उत्तर कोरियासंग निकट रहेका विज्ञहरुले बताएका छन् ।

उक्त विभागलाई पार्टीका गतिविधिहरुलाई शुक्ष्म रुपमा अध्ययन गर्न बनाइएको पार्टी भित्रको पार्टीको उपनाम पनि दिइएको छ । किम यो जोङलाई सैन्य बाहेकका अन्य सबै विधाहरुमा निर्णायक अधिकार दिइएको समाचारमा जनाइएको छ ।