कोरोनाले मृत्यु हुनेको संख्या २१२० पुग्यो, ७६ हजार भन्दा बढी प्रभावित

एजेन्सी – कोरोना भाइरसका कारण चीनसहित विभिन्न देशमा मृत्यु हुनेको संख्या २१ सय २० पुगेको छ। चीनको हुबेइ प्रान्तको स्वास्थ्य प्राधिकरणका अनुसार बुधबार मात्र एक सय आठ जनाको मृत्यु भएको छ।

गत डिसेम्बरमा सुरु भएको कोरोनाका कारण हुबेइ प्रान्तमा मात्र दुई हजार बीस जनाको मृत्यु भइसकेको छ । यस्तै अन्य शहरसहित चीनमा मात्र दुई हजार एक सय बाह्र जनाको ज्यान गएको छ।

चीन बाहेक हङकङ, फिलिपिन्स, जापान, फ्रान्स र इरानमा पनि कोरोना प्रभावितहरुको मृत्यु भएको छ । विश्वभर कोरोनाका कारण ७६ हजार भन्दा बढी प्रभावित भएको अन्तर्राष्ट्रिय समाचार संस्थाहरुले जनाएका छन्।

यसैबीच कोरोनाको संक्रमण रोक्न जहाजलाई नै क्वारेन्टाइनमा राखेपछि जापानको सर्वत्र आलोचना भएको छ।