जापानमा ज्येष्ठ नागरिकका कारण १४ प्रतिशत सवारी दुर्घटना

टोकियो- जापानमा हुने सवारी दुर्घटना मध्ये १४ प्रतिशत ज्येष्ठ जनगरिकका कारण हुने गरेको पछिल्लो अध्ययनले देखाएको छ ।

७० बर्ष वा सो भन्दा बढी उमेर समुहका मानिसहरुले चलाएका साना तथा ठूला सवारिसाधनहरु बढी गम्भिर दुर्घटनामा पर्ने गरेको पाईएको छ ।

सो उमेर समुहका मानिसहरुबाट सन् २०१८ मा ५९ वटा ठूला दुर्घटना भएका र सन् २०१९ सम्ममा आउदा सो संख्या बढेर ४०१ पुगेको जापानको राष्ट्रिय प्रहरीले बताएको छ ।

प्रति एक लाख सवारी चालक अनुमति पत्र बाहक मध्ये ७५ बर्ष माथिका बाहकहरुले ६.९ प्रतिशत ठूला दुर्घटना गराएको तथा ज्येष्ठ नागरिक तर ७५ बर्ष भन्दा कम उमेर समुहका अनुमति पत्र बाहकहरुले ३.१ प्रतिशत गम्भिर प्रकृतिका दुर्घटना गराएका छन् ।

बिभिन्न क्षेत्रमा सो उमेर समुहका मानिसहरुले गराएका गम्भिर प्रकृतिका दुर्घटनाहरुलाई मुल्याङ्कन गर्दै जापानको नेशनल पुलिस एकेडेमीले सवारी चालक अनुमति पत्र नविकरण सम्बन्धि कानुन तथा प्रकृया परिमार्जन गर्न प्रतिवेदन समेत तयार गरिसकेको छ ।

सो उमेर समुहका मानिसहरुले चलाएका सवारी साधनहरुले पोल हान्ने, ट्राफिक लाईट राम्ररी नदेखेर भयङ्कर दुर्घटना समेत गराउने गरेको पाइएकाले प्रहरीले नविकरणमा कडाई गर्ने रणनिती सहितको प्रतिवेदन सरकार तथा स्थानिय यातायात व्यवस्था विभागलाई बुझाएको प्रहरि श्रोतले बताएको छ ।