कोरोना भाइरसको सङ्क्रमणबाट अहिलेसम्म ६३० जनाको मृत्यु

एजेन्सी-गत डिसेम्बरकोे अन्त्यमा चिनियाँ बजारमा देखा परेको नयाँ कोरोना भाइरसले अहिलेसम्म ६३० भन्दा बढी व्यक्तिको ज्यान लिएको छ। सङ्क्रमण विश्वभर फैलिएको भएपनि यसले चिनबाहेकका मुलुकमा प्रकोपका रूपमा नदेखिएको विश्व स्वास्थ्य संगठनले जानकारी गराएको छ।

पछिल्लो तथ्याङ्क अनुसार कोरोना भाइरसको सङ्क्रमणका कारण चीनमा ३० हजारभन्दा बढी व्यक्तिले उपचार गराइरहेका छन्।

चिनियाँ मुख्य भूमि बाहिर विभिन्न ३० स्थानमा करीव २४० जना व्यक्तिमा कोरोना भाइरसको सङ्क्रमण भएको बताइएको छ। अहिलेसम्म हङकङ र फिलिपिन्समा २ जना व्यक्तिको मृत्यु भएको छ।

पछिल्लो तथ्याङ्क अनुसार कोरोना भाइरसको सङ्क्रमण सबैभन्दा बढी क्रुज जहाज, डाइमण्ड प्रिन्सेसमा ६१ जना रहेका छन् भने सिंगापुरमा ३०, जापानमा २५, थाइल्याण्डमा २५, हङकङमा (मृत्यु भएका एक व्यक्तिसहित) २४, दक्षिण कोरियामा २३, ताइवानमा १६ अष्ट्रेलियामा १५ र मलेसियामा १४ व्यक्तिमा भएको छ।

त्यसैगरी जर्मनीमा १३, संयुक्त राज्य अमेरिकामा १२, भियतनाममा १०, मकाउमा १०, फ्रान्समा ६ क्यानडामा ५, संयुक्त अरब इमिरेट्समा ५ , बेलायतमा ३, भारतमा ३, फिलिपिन्समा (मृत्यु भएका एक व्यक्तिसहित) ३ व्यक्तिमा नयाँ कोरोना भाइरसको सङ्क्रमण देखिएको छ।

रूस र इटाली मा २/२ जना व्यक्तिमा कोरोना भाइरसको सङ्क्रमण देखिएको छ। नेपाल, श्रीलङ्का, कम्बोडिया, फिनल्याण्ड, स्पेन, स्वीडेन, बेल्जियममा १/१ जनामा नयाँ कोरोना भाइरसको सङ्क्रमण भेटिएको छ।