महाभियोगमा सफाइ पाएपछि ट्रम्पले दिए रोषपूर्ण प्रतिक्रिया

बीबीसी – महाभियोगमा सफाइ पाएको एक दिनपछि अमेरिकी राष्ट्रपति डोनल्ड ट्रम्पले आफ्ना राजनीतिक प्रतिद्वन्द्वीमाथि रोष पोखेका छन्।

ह्वाइट हाउसको इस्ट रूममा आफ्ना समर्थक एवं मन्त्रिमण्डलका अधिकारीहरूसँग उनले बरिष्ठ डेमोक्र्याटहरू दुष्ट, स्वार्थी र बेकारका मानिसहरु रहेको बताएका छन् ।

झण्डै एक घण्टा चलेको कार्यक्रमलाई ट्रम्पले मन्तव्य वा पत्रकार सम्मेलन केही नभइ सीर्फ विजय उत्सव भएको बताएका थिए ।

ट्रम्पलाई सफाइ शीर्षक राखिएको एउटा पत्रिका देखाउँदै उनले  आफूले जीवनमा गलत कामहरू पनि गरेको स्वीकार गरेका छन् ।

रिपब्लिकनहरूको बाहुल्य रहेको सिनेटले महाभियोगमा दिएको सफाइलाई ट्रम्पले आफूमाथिको पूर्ण अनुमोदनको रूपमा अर्थ्याएका छन् ।

रिपब्लिकन पार्टीको बहुमत रहेको माथिल्लो सदन सिनेटमा बुधवार भएको मतदानमार्फत् ट्रम्पले शक्तिको दुरूपयोग र अमेरिकी संसद्लाई अवरुद्ध तुल्याएको अभियोगमा सफाइ पाएका थिए।