हलिउडका सु-प्रसिद्ध कलाकार कर्क डग्लसको निधन

एजेन्सी-हलिउडको इतिहासमा फिल्म निर्माणमा स्वर्णकाल मानिएको सन् १९४० को दशकका सुप्रसिद्ध कलाकार कर्क डग्लसको १०३ वर्षको उमेरमा निधन भएको छ।

डग्लसका छोरा एवं ओस्कार विजयी कलाकार तथा फिल्म निर्माता माइकल डग्लसले आफ्ना पिताको निधन बेभर्ले हिल्समा आफ्नै निवासमा भएको पुष्टी गरेका थिए। माइकल डग्लसले पिताको निधनका बारेमा फेसबुकबाट सार्वजनिक गरेका थिए।

आफ्नो समयमा निकै ख्याती कमाएका “स्पार्टाकस” र “पाथ्स् अफ ग्लोरी” जस्ता चलचित्रमा डग्लसले मुख्य भूमिका निर्वाह गरेका थिए।

सन् १९४० को दशकको अन्त्यतिर कर्क डग्लसले अभिनय गरेका चलचित्रहरु औधि रुचाइएका थिए। कर्क डग्लस अभिनयका अलावा फिल्म निर्माता र निर्देशकको शसक्त भूमिका निभाएका थिए। करिब छ दशकको कलायात्रामा डग्लसले करिब १०० वटा चलचित्र निर्माण गरेका थिए। सन् १९४९ मा च्याम्पियनका लागि ओस्कारमा मनोनयन प्राप्त गरेका उनी फिल्म क्षेत्रमा धेरै नै चर्चित थिए।