चर्चित अमेरिकी बास्केटबल कोबे ब्रायन्टको हेलिकप्टर दुर्घटनामा मृत्यु

एजेन्सी-अमेरिकी सुप्रसिद्ध बास्केटबल खेलाडी कोबे ब्रायन्टको आइतबार हेलिकप्टर दुर्घटनामा मृत्यु भएको छ। हेलिकप्टरमा सवार उनकी १३ वर्षीया छोरी जियाना सहित सबै नौ जनाको मृत्यु भएको छ।

४१ वर्षिय ब्रायन्ट चढेको हेलिकप्टर लस एन्जलसको पश्चिमको कालाबासासको पहाडी भागमा दुर्घटनाग्रस्त भएको थियो। खोज तथा उद्धार टोली दुर्घटनास्थलमा तत्कालै पुगे पनि कसैलाई बचाउन सकेका थिएनन्।

अमेरिकी बास्केटबल एसोसिएसनमा पाँच पटकका च्याम्पियन तथा दुई पटक ओलम्पिक स्वर्ण पदक विजेता ब्रायन्टलाई अमेरिकी इतिहासमा महान बास्केटबल खेलाडीका रुपमा लिइन्थ्यो । लस एन्जलस लेकर्समा दुई दशक बिताएका ब्रायन्टलाई धेरै बास्केटबल खेलाडीका लागि पथप्रदर्शक र सम्मानका साथ हेरिएको थियो।

लस एन्जलसका अग्निनियन्त्रकहरुले भिरालो पहाडी इलाकामा पुगेर उद्धारका कार्यमा जुटे पनि कसैलाई बचाउन नसकिएको राज्यको यातायात कार्यालयले जनाएको छ।

अमेरिकी राष्ट्रपति तथा अन्य विशिष्ट महानुभावले ब्रायन्टको निधनप्रति गहिरो समवेदना व्यक्त गरेका छन ।