ज्वालामुखि विष्फोटपछि १३ सय कोरियाली यात्रु अलपत्र

सोल-फिलिपिन्समा गएको शक्तिशाली ज्वालामुखि विष्फोटपछि कोरिया उड्न लागेका १३०० कोरियाली नागरिक मनिला स्थित निनोए एक्वीनो अन्तराष्ट्रिय विमानस्थलमा अलपत्र परेका छन् ।

विमानस्थल प्रशासनले सम्पूर्ण उडानहरु स्थगित गरेपछि उनीहरु विमानस्थलमै रहेका हुन् ।सो उडान अवरुद्धका कारण गुआम तथा स्पेनमा जाडो विदा मनाउन हिडेका पर्यटकहरु समेत प्रभावित बनेका छन् ।

गत आइतवार मनिला भन्दा करिव ६५ किलो मिटर दक्षिणमा रहेको ताल भोल्क्यानोमा भएको उक्त विष्फोटका कारण करिव १७० अन्तराष्ट्रिय उडानहरु बन्द गरिएका थिए जस मध्ये एक दर्जन भन्दा बढी कोरियन उडानहरु रहेका थिए । विष्फोटका लाभा तथा खरानीका कणहरु उक्त विमानस्थल सम्मै आइपुगेका थिए ।

समाचार एजेन्सीहरुका अनुसार कोरिया उडान भर्न लागेका कोरियन एयर, एसियाना एयर, तथा जिजु एयर लगायतले आफ्नो कोरिया उडान स्थगित गरेका थिए ।समाचार एजेन्सीहरुका अनुसार उक्त विष्फोटबाट फिलिपिन्समा रहेका करिव ८५ हजार कोरियन आप्रवासीहरु पनि प्रत्यक्ष अप्रत्यक्ष रुपमा प्रभावित बनेका थिए ।