इरानमा प्रदर्शन चर्कियो, सरकार र सर्वोच्च नेताविरुद्ध नाराबाजी

एजेन्सी-इरानका विभिन्न सहरमा सरकार र सर्वोच्च नेता आयतूला अली खामनेई विरोधी प्रदर्शन भएको छ।

प्रदर्शनकारीहरूले गत हप्ता अमेरिकी हवाई आक्रमणमा मारिएका सैन्य नेता कासिम सुलेमानीका तस्बिर पनि च्यातेका छन्।

एक सय ७६ जनाको ज्यान जानेगरी तेहरानमा भएको विमान दुर्घटनाबारे सरकारले झुट बोलेको भन्दै विरोध सुरु भएको त्यहाँका अधिकारीहरुले बताएका छन् ।प्रदर्शनकारीलाई तितरबितर पार्न अश्रुग्यास प्रहार भएको छ भने धेरै व्यक्ति पक्राउ परेका छन्।

इरानी नागरिकसहित विभिन्न देशका यात्रु चढेको युक्रेनी विमान इरानी क्षेप्यास्त्र प्रहारका कारण भुइँमा खसेको थियो। पहिला क्षेप्यास्त्र प्रहार नभएको दाबी गरेको भए पनि शनिवार इरानी सेनाले मानवीय त्रुटिका कारण त्यसो हुन गएको स्वीकारेको थियो ।

प्रदर्शन चर्कदै गएपछि इरानमा धेरै संख्यामा सुरक्षाकर्मी परिचालन गरिएको छ।इरानले इराकस्थित अमेरिकी सैनिकहरू बसेका दुईवटा आधार शिविरमा क्षेप्यास्त्र आक्रमण गरेको केही घण्टापछि नै विमान दुर्घटना भएको थियो।

जनवरी ३ मा अमेरिकी ड्रोन आक्रमणमा इरानका सैन्य नेता कासिम सुलेमानी मारिएपछि इरानले अमेरिकाविरुद्ध प्रतीकात्मक गतिविधि गर्दै आएको छ।