भुलबस युक्रेनी विमान खसालेको इरानी सेनाको स्वीकार

बीबीसी – इरानको सेनाले भुलवश युक्रेनी विमानलाई खसालिएको स्वीकार गरेको छ । इरानी सेनाले शनिवार विज्ञप्ति निकालेर मानवीय त्रुटिका कारण युक्रेनी विमान खसालिएको प्रष्ट पारेको इरानी सरकारी टेलिभिजनले जनाएको छ ।

विमानमा दुर्घटनामा परी १७६ नागरिकको मृत्यु भएको थियो । सरकारी टेलिभिजनबाट सार्वजनिक गरिएको विज्ञप्तिमा घटनामा संलग्न व्यक्तिलाई कारबाही गरिने उल्लेख गरिएको छ ।

यसअघि इरानी क्षेप्यास्त्रका कारण यात्रुबाहक विमान बुधवार तेहरानमा दुर्घटनाग्रस्त भएको बताईएको थियो । इरानले इराकस्थित अमेरिकी सैनिकहरू बसेका दुईवटा आधार शिविरमा क्षेप्यास्त्र आक्रमण गरेको केही घण्टापछि नै उक्त विमान दुर्घटना भएको थियो ।

तेहरानबाट उडेको युक्रेन इन्टरनेशनल एअरलाइन्सको विमान ७५२ मा धेरै यात्रु इरान र क्यानडाका थिए । मृतकमध्ये १५ जना बालबालिका थिए ।