कोरियन युवा योग्यता भन्दा तल्लो स्तरको काम गर्छन

सोल- बैङ्क अफ कोरियाले हालै सार्वजनिक गरेको एक प्रतिवेदन अनुसार विश्वविद्यालय स्तरको अध्ययन सकेका धेरै जसो युवाहरु आफ्नो योग्यता भन्दा तल्लो स्तरको काम गर्दै आएका छन् ।

अध्ययनका अनुसार उनीहरु त्यसरि योग्यता भन्दा तल्लो हैसियतको काम गर्नुको पछाडी कोरियाको सुस्त अर्थतन्त्र जिम्मेवार रहेको छ ।

अध्ययनका अनुसार सन् २००० को दशकमा कोरियामा करिव ६.३१ मिलियन रोजगारका अवसरहरु सृजना भएता पनि विश्वविद्यालय स्तरको अध्ययन सम्पन्न गर्ने बिद्यार्थीको संख्या करिव ६.३३ मिलियन रहेको छ भने गएको सेप्टेम्बरमा जारि प्रतिवेदनको अर्को संस्करणमा सन् २०१० को दशकमा करिव १०.८ मिलियन रोजगारका अवसरहरु सृजना भएता पनि विश्वविद्यालय स्तरको अध्ययन सक्ने विद्यार्थिको संख्या करिव १५.१२ मिलियन रहेको छ ।

बैङ्क अफ कोरियाका अनुसार विश्वविद्यालय स्तरको अध्ययन सक्ने विद्यार्थिको संख्या वार्षिक करिव ४.३ प्रतिशतले बढ्दै गइरहेको छ भने रोजगारीको अवसर भने मात्र २.८ प्रतिशतले बढ्दै गइरहेको छ ।

अध्ययनका अनुसार करिव ५ प्रतिशत मात्रले आफ्नो योग्यता अनुसारको रोजगार पाएका छन् भने करिव ८५ प्रतिशतले योग्यता भन्दा तल्लो स्तरको रोजगार गरिरहेका छन् । बाँकी रहेकाले जागिर छोड्ने गरेका छन् । यसको कारण अध्ययन र रोजगार विचमा सन्तुलन नहुनु रहेको प्रतिवेदनले उल्लेख गरेको छ ।