कोरियन महिला ९५ प्रतिशतले जागिर छोड्न चाहन्छन

सोल- केवि आर्थिक अध्ययन प्रतिष्ठानका अनुसार करिव ९५ प्रतिशत बच्चा भएका आमाहरुले गर्दै आएको जागिर छोड्न चाहेको देखिएको छ ।

उक्त प्रतिष्ठानले करिव २हजार जना बच्चा सहितका आमाहरुमा गरेको अध्ययनमा करिव ५ प्रतिशत महिलाहरुले मात्र कुनै पनि हालतमा जागिर छोड्न नचाहेको बताएका छन् ।

अध्ययनका अनुसार जागिर छोड्न चाहाने अधिकांश आमाहरुले आफ्ना बच्चाहरुको उज्ज्वल भविष्य तथा उनिहरुको उचित लालनपालनका निम्ति आफूहरुले जागिर छोड्न लागेको बताएका छन् ।

अध्ययनका अनुसार करिव ३९.८ प्रतिशत महिलाहरुले बच्चाहरु विद्यालय जान थालेपछि जागिर छोड्न चाहेको तथा करिव ३०.७ प्रतिशत महिलाहरुले गर्भावस्थामै जागिर छोड्न चाहेको पनि देखिएको छ ।

करिव ३४.३ प्रतिशत महिलाहरुले अभिभावकहरुलाई बच्चाको हेरचाह गर्न लगाएर काममा जाने तथा करिव २०.१ प्रतिशत महिलाहरुले आफन्तहरुलाई बच्चाको हेरचाह गर्न लगाउने गरेको पाइएको छ ।