७ लाख कोरियाली युवामा डिप्रेसन, सचेतना नगरे भयाबह हुने

सोल-दक्षिण कोरियाली युवाहरुमा डिप्रेसन बढ्दै गएको छ | यो बर्षमात्र करिव १ लाख २० हजार युवाहरु आफ्नो डिप्रेसनको अवस्थाबारे बुझ्न स्वास्थ्य संस्था गएको समाचार बाहिर आएको छ ।

आफ्नो क्षमता अनुसारको रोजगार नपाउनु, बेरोजगार हुनु तथा विवाहका निम्ति भनेजस्तो साथि नपाउनु डिप्रेसनका प्रमुख कारण रहेका छन् ।

स्वास्थ्य वीमा पुनरावलोकन तथा सहयोग समितिको सर्वेक्षण अनुसार सन् २०१४ मा डिप्रेसनको सिकार भएका कोरियालीहरुको संख्या करिव ५ लाख ८८ हजार १ सय ५५ जना रहेको थियो भने उक्त संख्या बढेर सन् २०१९ सम्ममा ७ लाख ५१ हजार ९ सय ३० जना पुगेको छ ।

सामसुङ मेडिकल सेन्टरका सञ्चालक जियोन होङ जिनका अनुसार डिप्रेसनको सिकार हुनेहरुमा प्राय २० देखि ३० वर्ष सम्मका युवाहरु रहेका छन् |

यसको प्रमुख कारण पारिवारिक खटपट रहेको उनले बताएका छन् । उनका अनुसार यो रोगका कारण युवाहरुमा आत्महत्या गर्ने क्रम पनि बढ्दै गएको छ ।

विद्यालय स्तरबाटै सचेतना, जानकारी लगायतका कार्यक्रमहरु सञ्चालन नगरिए यो समस्या अझ भयावह हुने समेत उनले बताए ।