पूर्व प्रधानमन्त्री सुशील कोइरालाको फोन किन उठाएनन् माेदीले?

काठमाडाैं-सरकारले कालापानी क्षेत्र नेपालकै भएको प्रस्ट पारेको छ । भारतले तीन दिनअघि सार्वजनिक गरेको नयाँ राजनीतिक नक्सालाई लिएर सरकारले यस्तो घारणा सार्वजनिक गरेको हो ।

नेकपा अध्यक्ष पुष्पकमल दाहाल ‘प्रचण्ड’ ले लिपुलेकको विषयमा सरकार गम्भीर बन्नुपर्ने बताएका छन् । प्रेस संगठनले बुधबार घोराहीमा आयोजित पत्रकार सम्मेलनमा उनले आफूले यसबारे भारतका प्रधानमन्त्री नरेन्द्र मोदीसँग केही समयअघिको भेटमा स्पष्ट कुरा राखेको बताए ।

लिपुलेकबारे छलफल गर्न खोज्दा मोदीले तत्कालिन प्रधानमन्त्री सुशील कोइरालाको फोन नउठाएको विगत छ । नेपाललाई जानकारी निदिइ लिपुलेक भञ्ज्याङबाट व्यापार आदन प्रदान गर्न चीन र भारतले चार वर्षअघि सम्झौता गरेपछि प्रधानमन्त्री कोइरालाले समकक्षी नरेन्द्र मोदीसँग छलफल गर्न खोजेका थिए । तर, त्यो सम्भव भएन ।

तत्कालिन परराष्ट्र सल्लाहकार डा. दिनेश भट्टराईका अनुसार २०७१ साउनमा भारतीय प्रधानमन्त्री नरेन्द्र मोदी नेपाल आएका बेला दुई प्रधानमन्त्रीबीच हरेक महिना टेलिफोन संवाद गर्ने सहमति बनेको थियो । तर, चीनसँगको सहमतिपछि त्यो संवाद निरन्तर हुन सकेन । ‘हाम्रा प्रधानमन्त्रीज्यूले लिपुलेक, कालापनीका विषयमा मोदीजीसँग छलफल गर्ने तयारीका साथ टेलिफोन गर्नुभयो । तर, उताबाट रिसिभ भएन,’ भट्टराईले भने ।

लिपुलेक र कालापानीलाई भारतले आफ्नो राजनीतिक नक्सामा पारेको विषयमा प्रधानमन्त्री केपी शर्मा ओलीसँग जानकारी लिने भएका छन् ।