जापानमा आँधीका कारण ३० को मृत्यु ,१५ अझै बेपत्ता

टोकियो-जापानमा आइतबार आएको हागीबिस आँधीका कारण ज्यान गुमाउनेको संख्या ३० पुगेको छ भने १५ जना बेपत्ता रहेका छन् ।

जापानी समाचार संस्थाहरुका अनुसार मृतक मध्ये खनागावा ४, तोचिगी ४, गुम्बा ४, मियाजाकी ६ जना, साइतामा २ र फुकुसिमामा ५, इवाते, चिबा, सिजुओखा, नगानो, इबाराकीकेनमा १ र १ जना गरी हाल सम्म ३० जनाको मृत्यु भएको हो |

समाचारमा फुकुसिमा, खानागावा लगायत ६ वटा क्षेत्रमा १५ जना अझै बेपत्ता रहेको उल्लेख गरेको छ ।

प्रभाबित क्षेत्रहरुमा उद्दार कार्य जारी रहेको आधिकारीहरुले बताएका छन् ।

आँधीका कारण घाइते हुनेहरुको संख्या १ सय ७७ पुगेको छ । यसअघी फुकुसिमाकेनमा उद्दार गर्ने क्रममा हेलिकप्टरबाट खसेर एकजना महिला घाइते भएकोमा उनको उपचारको क्रममा निधन भएको संचारमाध्यमहरुले जनाएका छन् ।

मध्य जापानमा शनिवार विहानैदेखी बन्द रहेको रेल सेवा आईतबार मध्यान्हबाट आंशिक रुपमा सुचारु भएको छ । सोमबारसम्ममा रेल सेवा पूर्णरुपमा सुचारु हुने समाचारमा जनाइएको छ ।

नागानो क्षेत्रमा चल्ने जापानका बुलेट रेलहरूसमेत डुबानका कारण अवरुद्ध भएका छन्। रेल कम्पनीका अनुसार १० वटा रेलका १२० डब्बामा क्षति पुगेको छ।

जापानको मौसम विज्ञानसम्बन्धी निकायले टोक्यो र प्रभावित १२ वटै राज्यमा भारी वर्षा हुने सम्भावना रहेको बताउँदै नदी वरपरका क्षेत्रमा सतर्क बन्न सूचना जारी गरेको छ।

त्यस्तै आँधीका कारण २ लाख भन्दा बढी घरमा अहिले पनि बिद्युत सेवा अबरुद्द छ । बिद्युत सुचारु हुन केही दिन लाग्ने बताइएको छ ।