दक्षिण कोरियामा स्वाइन फ्लुको संक्रमण तीव्र बन्यो

एजेन्सी- दक्षिण कोरियामा स्वाइन फ्लुको संक्रमण तीव्र बन्दै गएको छ भने यसको रोकथाम गर्न गरिएका प्रायजसो सबै प्रयास असफल जस्तै बन्दै गएका छन्। विगत २ साताको अवधिमा नै स्वाइन फ्लु भएका ९ केस भेटिएपछि कोरियाका धेरै प्रयास विफल बनेको त्यहाँका संचार माध्यमले उल्लेख गरेका छन्।

स्वाइन फ्लु नियन्त्रणका लागि भन्दै सरकारले देशका सबै सुँगुर फार्मसमेत बन्द गरिदिएको छ। बिहीबार सरकारले यस्तो निर्णय गरेको हो। शनिबारसम्म देशका सबै सुँगुर फार्म बन्द गरिएको यससम्बन्धी सबै समेत बन्द गरिएको कोरियाको कृषि मन्त्रालयले जानकारी दिएको छ।

अन्य छिमेकी देशका तुलनामा कोरियामा अफ्रिकी स्वाइन फ्लुको संक्रमण तीव्र रुपमा फैलिएको भन्दै सर्वत्र चिन्ता र चासो व्यक्त गर्न थालिएको छ।

गत सेप्टेम्बर १७ मा कोरियामा पहिलोपटक स्वाइन फ्लुको संक्रमण भेटिएको थियो। हालसम्म यो संख्या बढेर ९ पुगेको त्यहाँका सरकारी निकायले जानकारी दिएका छन्।

शुक्रबार मात्र इन्छनमा यसको संक्रमण भेटिएको थियो। सन् २०१८ अगस्टमा चीनमा देखिएको यसको संक्रमण १० दिनको अवधिमा ६ वटा मात्र संक्रमणका केस भेटिएको चीन सरकार र विश्व पशु स्वास्थ्य संगठनले उल्लेख गरेका थिए। तर सो भन्दा तीव्र गतिमा कोरियामा यसको संक्रमण फैलिएको छ।

१० दिनको अवधिमा नै भियतनाम र हङकङमा पनि एक एक मात्र संक्रमण देखिएका थिए। तर कम्बोडिया, मंगोलिया र लाओसमा भने १० दिनको अवधिमा ४ संक्रमण देखिएका थिए।

यता कृषिमन्त्री किम ह्येयोन सुले आकस्मिक रुपमा बैठक बोलाएका छन्। सेजोङ गभर्मेन्ट कम्प्लेक्समा आयोजित सो बैठकका उनले देशका उत्तरी सीमाका पशु क्वारेन्टाइन मापदण्डमा कडाइ गर्न निर्देशन दिएपछि यसको परीक्षण पनि कडा भएको बताएका छन्।

बिहीबार मात्र सरकारले सबै सुँगुर फार्म बन्द गराएको छ भने यसको काटमार र यससम्बन्धी सबै सेवा शनिबारसम्म बन्द गरेको छ।

दक्षिण कोरियाको उत्तरी क्षेत्रमा अफ्रिकी स्वाइन फ्लुको संक्रमण बढी देखिएको छ। कोरियामा हालसम्म सुँगुरमा मात्र देखिएको यो रोग मानिसमा भने नदेखिएको कोरियाली अधिकारीले दाबी गरेका छन्।