दक्षिण कोरिया र अमेरिकाको संयुक्त सैन्य अभ्यास पैसाको बर्बादी- राष्ट्रपति ट्रम्प

सोल- संयुक्त राज्य अमेरिकाका राष्ट्रपति डोनाल्ड ट्रम्पले भर्खरै सम्पन्न दक्षिण कोरिया र अमेरिकाको संयुक्त सैन्य अभ्यास “अनावश्यक” र “पैसाको बर्बादी” भनेका छन्। प्योंगयांगको छोटो दूरीको प्रक्षेपणको परीक्षणले गर्दा बढेको तनावको बावजुदपनि उनले यस्तो बयान दिएका छन्।

आइतबार फ्रान्समा सात समूहको शिखर सम्मेलनको क्रममा ट्रम्पले पत्रकारहरूलाई भने, “प्योंगयांगको प्रक्षेपण परीक्षणले उत्तर कोरियाली नेता किम जोंग-उनसँगको सम्झौताको उल्लंघन हुँदैन जसमा आणविक र लामो दूरीको ब्यालिस्टिक मिसाइल परीक्षण समावेश छ।”

प्योंगयांगले दाबी गरेअनुशार नयाँ सुपर-रकेट प्रक्षेपण प्रणालीको परीक्षण गरेको छ।

“म यस बारे खुसी छैन। तर फेरि उनले(किम) सम्झौताको उल्लंघन पनि गरेका छैनन्,” ट्रम्पले जापानका प्रधानमन्त्री शिन्जो आबेसँग बिआरिट्जमा जी ७ शिखर सम्मेलनको द्विपक्षीय वार्ताको अवसरमा भने।

“गत हप्ता उनीबाट मैले एउटा राम्रो चिठी प्राप्त गरें। हामी सन्देश आदान-प्रदान गरिरहन्छौ। दक्षिण कोरियाले ‘युद्ध खेल’ गरिरहेकोमा उनी दु: खी थिए,” उनले थपे।

सैन्य अभ्यासमा नकारात्मक रुपमा लिदै ट्रम्पले भने, “मलाई स्पष्टसँग लाग्छ कि यो गर्न अनावश्यक थियो।”