लिबर्टी कोरिया पार्टीले सरकार विरोधी प्रदर्शन गर्ने

सोल- दक्षिण कोरियाको प्रमुख प्रतिपक्षी दल लिबर्टी कोरिया पार्टीले सरकार विरुद्ध प्रदर्शन गर्ने भएको छ। राजधानी सोलमा यो साताभर उसले प्रदर्शन गर्ने तयारी गरेको हो। विगत तीन महिनायता पार्टीले ठुला प्रदर्शन नगरेको र अबका प्रदर्शन यस अवधिकै ठुलो भएको पार्टीका नेताले बताएका छन्।

राष्ट्रपति मुन जे इनका विषयमा पार्टीले विरोध जनाउँदै आएको छ। उनले लिएका उदार अर्थनीति र व्यक्तिगत व्यवस्थापनका विषयमा पनि आलोचना हुँदै आएको छ।

राष्ट्रपति मुन जे इनले विगतमा एक उच्च सरकारी अधिकारी समेत रहेका चो कुकलाई न्यायमन्त्री बनाएपछि पार्टीले विरोध चर्काएको हो। यसका साथै उत्तर कोरियाका सम्बन्धमा दिइएका अभिव्यक्ति र आर्थिक नीतिका विषयमा पनि पार्टीले विरोध जनाएको छ।

‘र्याली निकै ठुलो हुनेछ। यसले सरकारविरोधी चर्का नारा घन्काउनेछ,’ लिबर्टी पार्टीका नेता ह्वाङ क्यो आनद्वारा जारी विज्ञप्तिमा भनिएको छ,’ सरकारले पश्चगमनका गतिविधि नरोकेसम्म विरोध जारी रहन्छ।’