दक्षिण कोरिया र जापानको व्यापारिक सम्बन्धमा दरार

सोल- दक्षिण कोरिया बिरुद्ध जापानले थप व्यापार प्रतिबन्धहरूको घोषणा गरेपछि दुई देशको सम्बन्धमा दरार आएको छ |

अन्तर्राष्ट्रिय संचार माध्यमहरुले जनाए अनुसार जापानले आफु बिरुद्ध लगाइएको प्रतिबन्धले आर्थिक युद्ध छेडिएको आरोप दक्षिण कोरियाले लगाएको छ।

जापानले आफ्ना विश्वासिलो व्यापार साझेदारको सूचीबाट दक्षिण कोरियालाई हटाइदिएपछि दुई देशबीचको तनाव बढेको हो।

गत महिना जापानले दक्षिण कोरियाका प्रविधि कम्पनीहरूका लागि आवश्यक रसायनहरूको निर्यातमा बन्देज लगाइ दिएपछि तनाव बढेको थियो।

जापानी घोषणालगत्तै दक्षिण कोरियाले जापानविरुद्ध उस्तै नीति लिने घोषणा गरेको छ।

एक अर्काविरुद्ध व्यापार प्रतिबन्धहरूको घोषणा गरेपछि जापान र दक्षिण कोरियाबीचको व्यापारिक तनाव झनै चर्किने सङ्केत देखिएका छन्।

जापानी घोषणालगत्तै सोलले टोक्योलाई आफ्ना सबैभन्दा विश्वासिला व्यापारिक साझेदारहरूको सूचीबाट हटाइएको बताएको छ।

दक्षिण कोरियाकी विदेशमन्त्रीले जापानको कदमको निन्दा गरेकी छन् |

दक्षिण कोरियाका राष्ट्रपति मुन जे इनले टोक्योका कदमहरू उनकै शब्दमा स्वार्थी र गैरजिम्मेवार भएको टिप्पणी गरेका छन्।