उत्तर कोरियाले गर्‍यो एक सातामा तेस्रो क्षेप्यास्त्र परीक्षण

एजेन्सी- उत्तर कोरियाले पछिल्लो एक सातामा आफ्ना क्षेप्यास्त्र प्रहारलाई तीव्रता दिएको छ । सोही क्रममा उत्तर कोरियाले शुक्रबार बिहानै पूर्वी तटीय क्षेत्रमा क्षेप्यास्त्र परीक्षण गरेको हो ।

उत्तर कोरियाले एक सातादेखि निरन्तर छोटो दूरीको क्षेप्यास्त्र प्रहार गरेको दक्षिण कोरियाका अधिकारीहरूले बताएका छन्। अमेरिका र दक्षिण कोरियाबीच यसै महिना संयुक्त सैन्य अभ्यास गर्ने योजनाप्रति कडा विरोध जनाइरहेको छ ।

दक्षिण कोरियाको सेनाका जोइन्ट चिफ एप स्टाफ (जेसीएस)का अनुसार स्थानीय समयअनुसार बिहान २ः५९ र ३ः२३ मिनेटमा गरिएका ती प्रहार सी अफ जापानमा खसेका थिए ।

अमेरिकी राष्ट्रपति डोनाल्ड ट्रम्पले पछिल्ला परीक्षण छोटो दूरीका र निकै सामान्य भएको भन्दै त्यसबाट आफू चिन्तित नभएको बताउने गरेका छन् ।

बुधबार उत्तर कोरियाले परिक्षण गरेका दुई वटा क्षेप्यास्त्रले २ सय ५० किलोमिटर दूरी पार गरेको दक्षिण कोरियाले बताएको थियो । उसका अनुसार ती अघिल्ला भन्दा फरक खालका क्षेप्यास्त्र थिए ।