कोरियाली राष्ट्रपतिले मजदुरको ज्याला प्रती घन्टा १० हजार वन पुर्याउन नसकेको भन्दै माफी मागे

सोल-दक्षिण कोरियाली राष्ट्रपति मुन जाए–इनले आफ्नो सन् २०२० सम्ममा श्रमिकको न्यूनतम ज्याला बढाउने प्रतिबद्धता पूरा गर्न नसकेको भन्दै आइतबार सार्वजनिक रूपमा क्षमायाचना गरेका छन्  ।

राष्ट्रपति मुनलाई उद्धृत गर्दै साङ–जोले भने, ‘राष्ट्रपतिका हैसियतमा मलाई निकै अफसोस लागेको छ किनकि मैले दक्षिण कोरियाली जनतासँग वाचा गरे अनुसार न्यूनतम पारिश्रमिकको लक्ष्य पूरा गर्न सम्भव भएन ।’

दक्षिण कोरियामा सन् २०१७ मा भएको राष्ट्रपतिय चुनावी अभियानका क्रममा मुनले श्रमिकको न्यूनतम ज्याला प्रतिघण्टा १० हजार वन (८.४८ अमेरिकी डलर) पुर्‍याउने वाचा गरेका थिए । राष्ट्रपति मुनले नीति निर्माणसम्बन्धी आफ्ना सेना प्रमुख किम साङ–जोमार्फत सार्वजनिक गरेको सन्देशमा क्षमायाचना गरेका हुन् ।

तर पछिल्लो प्रावधानअनुसार सन् २०२० देखि दक्षिण कोरियाको न्यूनतम पारिश्रमिक प्रतिघण्टा ८ हजार ५ सय ९० वन कायम हुनेछ । दक्षिण कोरियाले सन् २०१९ का लागि गत वर्ष १०.९ प्रतिशत पारिश्रमिक वृद्धि गरेको थियो । यस वर्ष दक्षिण कोरियाको आर्थिक वृद्धिदर दशककै कम भएकाले न्यूनतम ज्यालादर प्रतिघण्टा १० हजार कोरियाली वन पुर्‍याउने लक्ष्यसहितको नीति असफल भएको हो ।

साङ-जोले आइतबार चेओङ वा दायको न्यूनतम पारिश्रमिक निर्धारणप्रतिको जिम्मेवारीबारे पत्रकारहरूलाई जानकारी गराएका हुन् । चेओङ वा–दायका सहयोगीहरूसँग भनेका छन्, ‘राष्ट्रपति मुनले मुलुकको आर्थिक, रोजगारी र बजारको ग्रहणशिलताको अवस्था मध्यनजर गर्दै न्यूनतम पारिश्रमिक आयोगले कठिन निर्णय लिएको बताउनुभएको छ ।’ श्रम तथा व्यापार प्रतिनिधि र विज्ञहरूको समितिमा बुधबार भएको मतदानमा अर्को वर्षदेखि लागु हुने गरी २.९ प्रतिशत पारिश्रमिक वृद्धिको निर्णय गरिसकेको छ ।