दक्षिण कोरियाका पूर्व विदेशमन्त्रीका छोरा भागेर उत्तर कोरिया

सोल-दक्षिण कोरियाका पूर्वविदेशमन्त्रीका छोरा भागेर उत्तर कोरिया पुगेका छन् । उनका बुबाआमा पनि यसअघि सन् १९८६ मा भागेर उत्तर कोरिया पुगेका थिए |

दक्षिण कोरियाका कुनै पनि नागरिक तथा उच्च ओहदाका व्यक्ति भागेर उत्तर कोरिया जाने विरलै हुने घटनामध्ये उनी कम्युनिस्ट मुलुक उत्तर कोरिया पुगेका हुन् ।

उत्तर कोरियाका भने धेरै मानिसहरु भागेर दक्षिण कोरिया पुग्ने गर्छन् । प्राविधिक रुपमा दुई कोरिया आज पनि युद्धको अवस्थामा छन् र कुनै पनि देशका नागरिकले अर्को देशमा जान सरकारको अनुमति लिनुपर्छ ।

चोए यो प्रतिबन्ध छल्न पहिले तेस्रो मुलुक गएर उत्तर कोरिया गएको हुन सक्ने विश्वास गरिएको छ । उत्तर कोरिया पुगेका दक्षिण कोरियाली नागरिक चोए इन–गुकले आफ्नो जीवन कोरियाली प्रायःद्वीपको एकीकरणका लागि बिताउने घोषणा गरेका छन् ।

दक्षिण कोरियाको एकीकरण मन्त्रालयले दक्षिणका पूर्वपरराष्ट्रमन्त्री चोए तोक–सिन र ¥यु मि–योङका छोरा चोए प्योङयाङ पुगेको पुष्टि गरेको छ । उनी उत्तर कोरिया जानुको कारणबारे अनुसन्धान हुने दक्षिण कोरियाली एकीकरण मन्त्रालयले जनाएको छ । चोएले उत्तर कोरिया जान अनुमति नलिएको मन्त्रालयले जनाएको छ ।

उत्तर कोरिया पुगेका चोए ७३ वर्षीया दक्षिण कोरियाली नागरिक भएको बताइए पनि उनको व्यक्तिगत जीवन र राजनीतिक जीवनबारे निकै कम जानकारी छ । दक्षिण कोरियामा उनकी छोरी र श्रीमती रहेको बताइएको छ । उनका बाबुआमा कोरियाली युद्ध सकिएपछि भागेर उत्तर कोरिया जाने सबैभन्दा वरिष्ठ अधिकारी थिए ।

उत्तर कोरियाली अधिकारीहरुले चोएलाई फूलको गुच्छासहित प्योङयाङमा स्वागतका  तस्बिरहरु सार्वजनिक भएका छन् । उनीहरु चोएको आगमनले निकै खुसी देखिएका थिए । उत्तर कोरियाको भूमिमा पाइला राखेपछि चोएले पहिले नै उत्तर कोरिया नआएकोमा पश्चाताप व्यक्त गरेका छन् । उनले भनेका छन्, ‘म स्थायी रुपमा उत्तर कोरियामा बस्न चाहन्छु ।’

बाबुआमा उत्तर कोरिया भागेका कारण उनको जीवन दक्षिण कोरियामा सहज नभएको र उनले विभिन्न आरोपहरुको सामना गर्नुपरेका कारण उनले दक्षिण कोरियाबाट उत्तर कोरिया नै जाने निर्णय लिएको हुन सक्ने बताइएको छ ।

उत्तर कोरियामा रहेकी आमाका लागि पैसा पठाउन उनले दक्षिण कोरियामा रहेको आफ्नो जागिर पनि पटक पटक फेर्नुपरेको थियो । उनकी आमाको १ वर्षअघि सन् २०१६ मा मृत्यु भएको थियो ।

उनका बाबु चोए तोक–सिनले सन् १९६० को दशकमा दक्षिण कोरियाको विदेशमन्त्रीको रुपमा सेवा गरेका थिए । सन् १९७० मा दक्षिण कोरियामा पार्क चुङ–हाईको नेतृत्वमा सैनिक शासन सुरु भएपछि उनी अमेरिका पलायन भएका थिए । त्यसपछि सन् १९८६ मा उनी उत्तर कोरिया गएका थिए । उनीहरुले आफूहरु भाग्दा आफ्ना ५ जना छोराछोरी दक्षिण कोरियामा छाडेका थिए । चोएका बाबु चोए तोक–सिनको सन् १९८९ मा निधन भएको थियो ।

उत्तर कोरियाली भूमि पुगेका चोएले उत्तर कोरियाली नेताहरु किम इल–सुङ, किम जोङ–इल र किम जोङ–उनको प्रशंसा गरेका छन् ।