मोदीले प्रधानमन्त्रीको शपथ लिए

काठमाडौं-भारतीय प्रधानमन्त्री नरेन्द्र मोदीले दोस्रो कार्यकालका लागि शपथ ग्रहण गरेका छन् । बिहीबार साँझ राष्ट्रपति भवनमा आयोजित विशेष समारोहकाबीच मोदीले भारतको १५ औं प्रधानमन्त्रीको शपथ लिएका हुन् ।

राष्ट्रपति भवनमा साँझ ७ बजे नरेन्द्र मोदीले दोस्रो कार्यकालका लागि राष्ट्रपति रामनाथ कोबिन्दमार्फत पद तथा गोपनियताको शपथ लिएका हुन् ।

यसअघि मोदीको शपथ ग्रहण कार्यक्रममा सार्कका राष्ट्र तथा सरकार प्रमुखलाई निम्ता गरिएको थियो । सार्कमा पाकिस्तान समेत सदस्य छ भने विमस्टेकमा पाकिस्तान सदस्य छैन ।

प्रधानमन्त्री मोदीपछि राजनाथ सिंहले पद तथा गोपनियताको शपथ लिए । उनी मन्त्रिपरिषदमा मोदीपछि दोस्रो बरियतामा हुनेछन् । यस्तै भाजपा अध्यक्ष अमित शाहले पनि मन्त्रीपदको शपथ लिएका छन् । सिंह उत्तर प्रदेश र अमित शाह गुजरातबाट विजयी भएका हुन् ।

यसबाहेक क्याबिनेट मन्त्रीका रुपमा नितिन गडकरी, सदानन्द गौडा, निर्मला सीतारमण, रामबिलास पासवान, नरेन्द्र सिंह तोमर, रविशंकर प्रसाद, हरसीमरत कौर बादल, थापर चन्द गहलोत, एस जयशंकर, रमेश पोखरियाल निक, अर्जुन मुन्डा, स्मृति इरानीले पनि शपथ लिएका छन् ।

दिल्लीस्थित चाँदनी चोकबाट विजयी भएका डा.हर्षबर्धन पनि मन्त्री बनेका छन् । यस्तै प्रकाश जावडेकर, पीयूष गोयल, धर्मेन्द्र प्रधान, मुख्तार अब्बास नकवी, प्रह्लाद जोशी, महेन्द्रनाथ पाण्डेयले पनि मन्त्री पदको शपथ लिएका छन् ।

मोदी मन्त्रिपरिषदमा ४८ जना मन्त्री रहनेछन् । सन् २०१४ देखि हालसम्म विदेशमन्त्रीको भूमिका निभाएकी भाजपाकी प्रभावशाली नेतृ सुष्मा स्वराज भने यो पटक मन्त्री बनिनन् ।